काठमाडौं। अस्ट्रेलियाको बिग बाश लिगमा नेपाली खेलाडी सन्दिप लामिछाने आबद्ध टिम मेलबर्न स्टार्स अंक तालिकाको शीर्षमा रहने पक्का भएको छ । मेलबर्न स्टार्सले लिग चरणका ३ खेल खेल्न बाँकी नै छ । तर, ती तीनवटै खेल हारेको अवस्थामा पनि मेलबर्न स्टार्स अंक तालिकाको शीर्ष स्थानमै रहनेछ ।

मेलबर्नले ११ खेलमा १० जितसहित २० अंक जोडिसकेको छ । दोस्रो स्थानमा रहेको र समान ११ खेल खेलेको सिड्नी सिक्सर्सको मात्रै १३ अंक छ । उसले बाँकी सबै ३ खेल जितेमा र मेलबर्नले सबै खेल हारेमा पनि सिक्सर्सको बाँकी ३ खेलबाट मात्रै ६ अंक थपिनेछ र उसको अंक १९ मात्र हुनेछ । तेस्रो स्थानको एडिलेड स्ट्राइकर्सले ४ खेल खेल्न बाँकी छ । उसको अंक ११ छ र उसले सबै खेल जितेमा पनि ८ अंक थप्दै १९ अंक मात्र बनाउन सक्छ । अन्य कुनै पनि टिमको ४ खेल भन्दा धेरै खेल खेल्न बाँकी नै छैन । अर्थात मेलबर्नको २० अंक बराबरी गर्न सक्ने पनि कुनै टिमको सम्भावना छैन ।

बिग बाश लिगमा हरेक टिमले लिग चरणमा १४ खेल खेल्छन् । यी १४ खेलबाट प्राप्त अंक तालिकाको आधारमा पहिलो र दोस्रो स्थानमा रहने टिमले प्लेअफमा सिधै क्वालिफायर खेल्न पाउँछन् । यो जितेमा सिधै फाइनल पुग्छन्, हारेमा पनि अर्को खेल जितेर फाइनलसम्म पुग्ने अवसर हुन्छ । पहिलो र दोस्रो स्थानमा रहने टिमले प्लेअफको पहिलो खेल हारेमा पनि बाहिरिँदैनन् तर अरु सबै टिम एउटा मात्र खेल हारे बाहिरिन्छन् ।

पहिलो र दोस्रोमा रहन नसक्ने टिमलाई फाइनल पुग्न कठिन हुन्छ । किनकि तेस्रो स्थानमा रहने टिमले फाइनल पुग्न पहिलो क्वालिफायर र दोस्रो च्यालेन्जर गरी २ खेल लगातार जित्नुपर्ने हुन्छ । चौथो र पाँचौ स्थानमा रहने टिमले त फाइनलसम्म पुग्न प्लेअफमा पहिलो इलिमिनेटर, दोस्रो क्वालिफायर र तेस्रो च्यालेन्जर गरी लगातार ३ खेल जित्नुपर्ने हुन्छ ।

नियमअनुसार पहिलो प्लेअफ खेल चौथो र पाँचौं स्थानमा रहने टिमबीच इलिमिनेटर हुनेछ । यो जित्ने टिम प्रतिस्पर्धामा कायमै रहनेछ । हार्ने टिम बाहिरिनेछ । त्यसपछि पहिलो क्वालिफायर पहिलो र दोस्रो स्थानमा रहने टिमबीच हुनेछ । यो खेल जित्ने टिम सिधै फाइनल पुग्नेछ ।

त्यसपछि नकआउट खेल हुनेछ । यो खेल तालिकाको तेस्रो स्थानमा रहेको टिम र चौथो तथा पाँचौं स्थानमा रहेकाबीचको क्वालिफायरको विजेताबीच हुनेछ । यो खेल हार्ने टिम बाहिरिनेछ, जित्ने टिमले च्यालेन्जर खेल खेल्नुपर्नेछ । च्यालेन्जरमा पहिलो र दोस्रोबीच भएको क्वालिफायरमा हारेको टिम र नकआउटको विजेताबीच हुनेछ । यो खेल जित्नेले फाइनलमा क्वालिफायरको विजेतासँग उपाधिका लागि प्रतिस्पर्धा गर्नेछ ।