नयाँ दिल्ली। भारतको गणतन्त्र दिवसको अवसर पारेर देशको विशिष्ट मानिने पद्मश्री सम्मान बलिउड गायक अदनान सामीलाई दिने भारत सरकारको निर्णयपछि भारतमा विवाद भएको छ । लामो समयदेखि भारतमा रहेर संगीत सिर्जनामा सक्रिय सामी खासमा पाकिस्तानी थिए । उनले पाकिस्तानी नागरिकता त्यागेर भारतीय नागरिकता लिएको ४ वर्ष मात्र भएको छ । त्यसैले भारतमा उनलाई पद्मश्री सम्मान दिने कुराको विरोध भएको हो ।

पछिल्लो समय सामीलाई सामाजिक संजालमा ट्रोल गरिएको छ । विपक्षी दल पनि सामीलाई पद्मश्री दिएको विरोधमा छ । विरोधीहरुले अदनानका पिता पाकिस्तानी सेनामा थिए र उनले भारतविरुद्ध युद्ध लडेका थिए भन्ने कुरालाई आधार बनाएर उनलाई सम्मान दिएको विरोध गरिरहेका छन् । यस विषयमा स्वयं गायक अदनान सामीले आफ्नो धारणा राखेका छन् । उनले यस विषयमा आफ्ना पिताको नाम तानिएकोमा केही दुःख लागेको र केही हाँसोसमेत लागेको बताए ।

उनले भने ‘मेरा पिता पाकिस्तानी एयरफोर्समा हुनुहुन्थ्यो । मेरा पिता युद्धका हिरो हुनुहुन्थ्यो । पाकिस्तानको तर्फबाट १९६५ मा उहाँले भारतविरुद्ध युद्ध लड्नुभएको थियो । उहाँले आफ्नो देशको लागि काम गर्नुभयो र म उहाँप्रति गर्व गर्छु । तर अहिलेको सम्मानको विषयमा मेरा पिताको नाम तान्नुको कुनै तुक छैन ।’

अदनानले अगाडि भने ‘मलाई यो अवार्ड दिइनु र राजनीतिको कुनै सम्बन्ध छैन । यो आफ्नो क्षेत्रमा सर्वोत्कृष्ट कामको लागि दिइन्छ । सबैभन्दा अहम कुरा मलाई यो सम्मान कलाको लागि दिइएको हो । मैले आफ्नो काम देशको लागि गरें र उहाँले (पिताले) पनि देशको लागि आफ्नो काम गर्नुभयो । दुवै पूर्ण रुपमा फरक फरक कुरा हुन् । यिनीहरुलाई एकसाथ जोड्नुको कुनै अर्थ छैन ।’