काठमाडौं। नेपाली काँग्रेसका प्रवक्ता विश्वप्रकाश शर्माले लोकतन्त्र विधिमात्रै नभएर संस्कृति पनि भएको बताएका छन्।

नेपालमा लोकतन्त्र, चुनौति र अगाडिको बाटो विषयक अन्तक्र्रियामा प्रवक्ता शर्माले लोकतन्त्र विधि सँगसँगै संस्कृति पनि भएकाले त्यही अनुसार चल्नुपर्ने बताए।

सरकारले पछिल्लो समय अगाडि सारेका विधेयकहरुले लोकतन्त्र नै खतरामा परेको बताउँदै शर्माले भने, ‘मिडिया काउन्सिल विधेयक, सूचना प्रविधि विधेयक, गुठी विधेयक जसरी सरकारले ल्याएको छ त्यसले लोकतन्त्रमा खतरा छ। बुढी गण्डकी नेपालले नै बनाउने भनेर डिजेल, पेट्रोलमा प्रतिलिटर ५ रुपैयाँका दरले लिने तर चिनियाँ गेजुवा कम्पनीलाई दिने? यस्तो अपारदर्शीताले खतरा छ।’

शर्माले संविधानको दायरा बढाउन गम्भिरता देखाउनुपर्ने र नभए लोकतन्त्रलाई नै त्यसले खतरा गर्ने बताए। उनले युवाहरुलाई व्यवसायिक बन्न पनि आग्रह गरे।

अर्थविद डा. स्वर्णीम वाग्लेले लोकतन्त्रलाई उन्नत बनाउन सांसदहरु मन्त्री बन्न नपाउने व्यवस्था लागु गर्दै जानुपर्ने बताए। चुनाव महंगो हुँदै गएकाले भ्रष्टाचार बढेको, सत्तामा आएपछि कार्यकर्ता पोस्ने प्रवृति हावी भएकाले लोकतन्त्रमा खतरा रहेको उनले बताए।

कार्यक्रम नयाँ बानेश्वरस्थित अल्फा हाउसमा भएको थियो। कार्यक्रममा पत्रकार बबिता शर्मा लगायतले आफ्नो धारणा राखेका थिए।