काठमाडौं । प्रहरी महानिरीक्षक सर्वेन्द्र खनालले अपराधीलाई कानूनको दायरामा ल्याउन निर्भिक, डिरर, इमान्दार एवम् कर्तव्यनिष्ठ भएर काम गर्न प्रहरी कर्मचारीलाई निर्देशन दिएका छन् ।

जिल्ला प्रहरी कार्यालय बझाङ परिसरमा नवनिर्मित कार्यालय, ब्यारेक, कार्यालय प्रमुख निवास र मेश भवनको मंगलबार भिडियो कन्फ्रेन्सबाट उद्घाटन गर्दै उत्कृष्ट भवनसँगै थप परिस्कृत प्रहरी सेवा प्रवाह गर्नुपर्ने चर्चा गरेका थिए ।

नेपाल प्रहरीमा आबद्ध भएर देश र जनताको सेवा गर्न पाउनु जीवनको सबै भन्दा ठूलो एवम् महत्वपूर्ण क्षण भएको बताउँदै उनले सबै निकायहरुसँग समन्वयात्मक रुपमा अगाडि बढेर आफूलाई प्राप्त जिम्मेवारी सम्पादन गर्नुपर्ने उल्लेख गरेका हुन ।

साथै अपराध नियन्त्रणका लागि नेपाल प्रहरीले अवलम्बन गरेको समुदाय–प्रहरी साझेदारी अवधारणा अन्तर्गत विभिन्न संघ संस्था तथा नागरिकहरुसँग समन्वय र सहकार्य गरी थप प्रभावकारी रुपमा सचेतनामूलक कार्यक्रम संचालन गर्न समेत उनले निर्देशन दिए । समाजमा भएका विकृति विसंगति निर्मूल गर्नका लागि प्रहरीले स्थानीय तह, विभिन्न संघसंस्था एवम् महिला, बालबालिका तथा जेष्ठ नागरिकहरुसँग हातेमालो गर्दै अगाडि बढ्नुपर्नेमा उनले जोड र्दिए।