डिसी नेपाल
वासिंगटन डिसी । अमेरिकाको मेरिल्याण्डस्थित पशुपति बुद्ध मन्दिरमा महाशिवरात्रि पर्व निकै धुमधामका साथ मनाइएको छ । फेब्रुअरी २१ तारिख शुक्रबार सांझ सो मन्दिरमा भगवान शिवको विशेष पूजा आराधना भएको थियो ।

मन्दिर व्यबस्थापन समिति, नेपाल एजुकेशन तथा सांस्कृतिक केन्द्रका अनुसार, विहान सबेरैदेखि डिसी, भर्जिनिया र मेरिल्याण्ड क्षेत्रका नेपाली धर्मावलम्बीहरुको निकै घुइचो लागेको थियो । दर्शनार्थीहरुलाई विशेष पूजा गर्ने सुविधासहित सजिलै भगवानको दर्शन गर्न पाइने व्यबस्था व्यबस्थापन समितिले गरेको थियो ।

दर्शनार्थीहरुले विहानैदेखि पूजा आरधना गरे पनि आयोजक संस्थाले सांझ ६ बजेर ३० मिनेटदेखि बेलुकी ९ बजेसम्मलाई शिवधुनीसहित भजन किर्तनको कार्यक्रम तय गरेको थियो ।

यसबीचमा योग गुरु सुबर्ण पन्तको सहजीकरणमा नटराज नृत्य तथा ध्यानको कार्यक्रम र त्यसपछि पंडित खिलराज पंडित द्वारा पूजा आरती गरी अन्त्यमा प्रसाद वितरण गरिएको थियो ।

भगवान शिवको नामका विभिन्न भजन कीर्तनसहित सम्पन्न शिवरात्रि समारोहमा भक्तजनहरुका लागि पूजाको प्रसादसमेत वितरण गरिएको थियो ।
त्यसैगरी परम्परादेखि चलेको भगवान शिवका नाममा सार्वजानिस्थलमा आगो बाली धुनी जगाउने काम पनि सो दिन सांझ मन्दिर परिसरमा सम्पन्न भएको थियो ।

नेपाल एजुकेशन तथा सांस्कृतिक केन्द्रका (एनईसीसी) प्रेसिडेन्ट खिलेन्द्र न्यौपानेले भक्तजनहरुलाई धन्यवाद दिदै कार्यक्रमको आरम्भ गर्नुभएको थियो ।