लस एन्जल्स। पूर्व विश्व च्याम्पियन बक्सर फ्लोएड मेवेदरकी पूर्व गर्लफ्रेण्ड जोसी ह्यारिसको रहस्यमय मृत्यु भएको छ । जोसीको शव उनको लस एन्जल्सस्थित घरमा पार्क गरी राखिएको कारमा भेटिएको छ । जोसी र मेवेदरका ३ सन्तान छन् । जोसीले २०१० मा मेवेदरमाथि घरेलु हिंसाको आरोप लगाएकी थिइन् । त्यसपछि मेवेदरले २ महिना जेलमा बिताउनु परेको थियो ।

जोसीको मृत्युको कारण खुल्न सकेको छैन । पुलिसले अनुसन्धान गरिरहेको जनाएको छ । मेवेदर र जोसी १९९५ देखि २०१० सम्म साथमा रहेका थिए । जोसीले अहिले घरेलु हिंसाको विषयमा एउटा किताब लेखिरहेकी थिइन् तर त्यो पूरा गर्नुभन्दा पहिले नै उनको मृत्यु भयो । जोसी अभिनेत्री थिइन् । उनले केही फिल्म र सिरियलमा काम गरेकी थिइन् ।