काठमाडौं। अमेरिकी राष्ट्रपति डोनाल्ड ट्रम्पका सहयोगीहरुले जर्मनीको एक फर्मास्युटिकल कम्पनीलाई कोरोनाभाइरसको भ्याक्सिन अमेरिकालाई मात्र दिनको लागि ठूलो रकमको प्रलोभन दिएको दावी गरिएको छ । राष्ट्रपति ट्रम्पले जर्मनीको अग्रणी फर्मास्युटिकल कम्पनी क्युरभ्याकलाई लोभ्याउने प्रयास गरेको स्रोतको हवाला दिँदै बेलायती मिडिया द सनले लेखेको छ ।

‘उनी औषधीको सर्वाधिकार अमेरिकाको लागि मात्र सुरक्षित गर्न प्रयास गरिरहेका छन्’ स्रोतले भन्यो । तर, जर्मनीका स्वास्थ्य अधिकारीहरु भने कम्पनीसँगै आफ्नै डील गर्नको लागि अगाडि आएको बताइएको छ । एक प्रवक्ताले भने ‘अमेरिकाको संघीय सरकार जर्मनी र युरोपमा विकास गरिने नोभेल कोरोनाभाइरसविरुद्धका भ्याक्सिन र एन्टिभाइरल एजेन्टप्रति निकै उत्सुक छ । यो प्रयोजनको लागि ऊ क्युरभ्याक कम्पनीसँग गहन विनिमयको प्रक्रियामा छ ।’

गएराती जर्मन अधिकारीहरुले ट्रम्पको प्रस्ताव टेबलबाट हटेको र क्युरभ्याक पूरै विश्वको लागि भ्याक्सिन विकसित गर्नको लागि सहमत भएको बताएका छन् । क्युरभ्याकले गत हप्ता आफूले विकास गरेकामध्ये सर्वोत्कृष्ट सम्भावित २ भ्याक्सिनलाई क्लिनिकल ट्रायलको लागि छनोट गरेको बताएको थियो ।

यस विषयमा ह्वाइट हाउसले केही बोलेको छैन । अमेरिकामा कोरोनाभाइरका कारण मृत्यु हुनेको संख्या ६२ पुगेको छ । ३ हजार २४४ मा संक्रमण पुष्टि भएको छ । सिएनएनको तथ्यांकअनुसार मार्च १५ सम्म अमेरिकाका ४९ राज्यमा संक्रमण पुष्टि भइसकेको छ । ४० जनाले वाशिङटन राज्यमा मात्र ज्यान गुमाएका छन् । क्यालिफोर्नियामा ५, फ्लोरिडामा ४, न्यूयोर्क र न्यूजर्सीमा २–२ जनाले ज्यान गुमाइसकेका छन् ।