काठमाडौं। अमेरिकी राष्ट्रपति डोनाल्ड ट्रम्पले कोरोनाभाइरस फैलिनबाट रोक्नका लागि अमेरिकी नागरिकलाई १० जनाभन्दा धेरैको संख्यामा जम्मा नहुन आग्रह गरेकै दिन उनकै गृहनगर फ्लोरिडामा उनको आग्रहको धज्जी उडाइयो । फ्लोरिडाको क्लियरवाटर बीच सयौंको संख्यामा पर्यटकहरु देखिए जसले ट्रम्पको आग्रहलाई महत्व दिएजस्तो देखिएको थिएन ।

तस्वीर र भिडियोमा फ्लोरिडाको पश्चिमी किनारामा रहेको यो समुद्र किनारमा सयौंको संख्यामा पर्यटक देखिएका छन् । फ्लोरिडाका केही समुद्र किनारहरु कोरोनाभाइरसको प्रकोपकै कारण बन्द गरिएको अवस्थामा पनि बन्द नगरिएका बीचमा भने भीड जम्मा भइरहेका छन् । क्लियरवाटर बीच नजिकै रहेको ट्याम्पा बीच पनि खुला र व्यस्त रहेको समाचारमा जनाइएको छ ।

कोरोनाभाइरसले विश्वभर ६ हजार ५ सय भन्दा धेरैको ज्यान लिइसकेको छ । अमेरिकामा मात्र ४ हजार ५ सय जना संक्रमित भइसकेका छन् र ७९ जनाले ज्यान गुमाइसकेका छन् । फ्लोरिडा राज्यमा मात्र १४९ जना संक्रमित भएको पुष्टि भइसकेको छ । संक्रमितमध्ये अधिकांश किशोरअवस्था देखि २५ वर्षसम्मका छन् । यो राज्यमा मात्र ४ जना भाइरसका कारण मरेका छन् ।