काठमाडौं । काठमाडौं बाहिर जाने यात्रुहरुसँग तोकिए भन्दा बढी भाडा लिएको अभियोगमा २३ जना पक्राउ परेका छन् । काठमाडौंबाट घर फर्कन लागेका यात्रुसँग बढी भाडा लिने बारा घर भई बल्खु बस्ने ३२ वर्षीय मुकेश प्रसाद साह लगायत २३ जनालाई प्रहरीले पक्राउ गरेको हो ।

महानगरीय प्रहरी कालिमाटी वृत्तले जनाए अनुसार काठमाडौंको बल्खु र कलंकीबाट उपत्यका बाहिर जाने यात्रुहरुसँग तोकिए भन्दा बढी भाडा असुल गरेका कारण उनीहरुलाई पक्राउ गरी अभद्र व्यवहार अन्र्तगतको मुद्धा चलाइएको छ ।

दशैं तिहारको जस्तै गरी काठमाडौमा रहेका सर्वसाधारणहरु घर फर्कन थालेपछि बस टिकट दलालहरुले बढी भाडा असुल्न थालेका छन्। बस टिकटमा दलाली हुन थालेपछि प्रहरीले शुक्रबार विहानदेखि बसपार्क र अन्य टिकट काउण्टरमा निगरानी बढाउन थालेको महानगरीय प्रहरी परिसरका प्रवत्ता होविन्द्र बोगटीले जानकारी दिए ।