बीबीसी । भारतको सम्पूर्ण जनसङ्ख्या तीन साता लामो कडा बन्देज अर्थात् ‘लकडाउन’ मा बस्न बाध्य भएका छन्। प्रधानमन्त्री नरेन्द्र मोदीले देशका एक अर्ब तीस करोड जनतालाई आफ्नो सुरक्षाका निम्ति कसैले घरबाहिर ननिस्कन आह्वान गरेका छन्। अन्यथा भारत दशकौँ पछाडि धकेलिने उनले बताए।

घुइँचो

टेलिभिजनमा उनले गरेको सम्बोधन लगत्तै पसलहरूमा आवश्यक किनमेल गर्न मानिसहरूको भिड लागेको थियो। भारतमा हालसम्म पाँचसय भन्दा धेरै कोरोनाभाइरस सङ्क्रमण भेटिएका छन् भने १० जनाको ज्यान गएको छ।

विश्वभरि सङ्क्रमणका सङ्ख्या चार लाख नाघेको जोन हप्किन्स विश्वविद्यालयले जनाएको छ। अठार हजारभन्दा धेरैको ज्यान गइसकेको छ।

मध्यरातबाट ‘लकडाउन’ लागु

भारतीय प्रधानमन्त्री नरेन्द्र मोदीले देशभर आवतजावत तथा घुमफिरमा बन्देज लगाएर कोरोनाभाइरस सङ्क्रमण फैलनबाट रोक्न चाहेको बताए।

उक्त बन्देज गएको मध्यरातबाट लागु भएको छ र आगामी २१ दिनसम्म जारी रहनेछ। “तपाइँहरूलाई घरबाहिर निस्कन पूर्ण बन्देज हुनेछ,” मोदीले भने।

उनले मानिसहरूलाई नआत्तिन भनेका थिए तर लगत्तै राजधानी दिल्लीका पसलहरूमा भिड लाग्यो। सम्वाददाताहरू भन्छन् बन्देजका बेला मानिसहरूलाई खानेकुरा तथा अन्य अत्यावश्यक वस्तु किनमेल गर्न कसरी दिइनेछ भन्ने प्रस्ट पारिएको छैन।