काठमाडौं। नेपालमा कोरोना भाइरसका नयाँ संक्रमित भेटिएका छन् । बुधबार स्वास्थ्य मन्त्रालयले एक व्यक्तिमा संक्रमण भेटिएको जानकारी दिएको छ।

कोरोनाको परीक्षणपछि ती व्यक्तिमा पोजेटिभ नतिजा आएको थियो । योसँगै नेपालमा कोरोना भाइरसको संक्रमित भएकाको संख्या तीन पुगेको छ। जसमध्ये एकजना संक्रमणमुक्त भएका छन् । अर्की एक किशोरी उपचार गराइरहेकी छिन्।

यसअघि चीन र फ्रान्सबाट फर्किएका विद्यार्थीमा कोरोनभाइरसको संक्रमण देखिएको थियो । चीनबाट आएका संक्रमित निको भएर घर फर्किसकेका छन् भने फ्रान्सबाट फर्किएकी १९ वर्षीया युवतीको अस्पतालमा उपचार भइरहेको छ ।

नेपालमा अहिलेसम्म ६८७ जनाको नमुना परीक्षण गरिएको छ, जसमध्ये ६८४ को रिपोर्ट नेगेटिभ आएको छ ।