सुर्खेत । कर्णाली प्रदेश सरकारको प्रदेश विपद् व्यवस्थापन कोषमा बुधबार ३० लाख सहयोग गरिएको छ । कोभिड–१९ को रोकथाम, नियन्त्रण, उपचार, राहत तथा आवश्यक व्यवस्थापनार्थ स्थापित कोषमा सुर्खेत बौद्ध ग्रामीण सहकारी संस्था लिमिटेडले २५ लाख र एनसिसी बैंक जिल्ला शाखाले ५ लाख आज सहयोग गरेका हुन् ।

बौद्ध सहकारी संस्थाका प्रमुख कार्यकारी अधिकृत विशाल केसी र बैंकका कर्णाली प्रदेश प्रबन्धक सञ्जय कार्कीले आन्तरिक मामिला तथा कानूनमन्त्री एवं प्रदेश विपद् व्यवस्थापन समितिका कार्यकारी संयोजक नरेश भण्डारीलाई चेक हस्तान्तरण गरे । बौद्ध ग्रामीण सहकारी संस्थाले प्रदेश विपद् कोषमा २५ र सुर्खेत वीरेन्द्रनगर नगरपालिका–९ वडालाई एक लाखसहित २६ लाखको सहयोग उपलब्ध गरी कर्णालीमा अहिलेसम्मकै सबैभन्दा ठूलो रकम सहयोग गरेको हो । सो सहकारीको र बैंकको चेक लिँदै कानूनमन्त्री भण्डारीले मनकारी संस्थाहरुप्रति कृतज्ञता प्रकट गरे ।

सहकारीका प्रमुख कार्यकारी अधिकृत केसीले मुलुकका सात प्रदेशमा कर्णाली सबैभन्दा कमजोर भएकाले कोरोनाविरुद्धको लडाइँमा सबै जिल्लामा स्वास्थ्यकर्मीलाई पिपिई, किट, मास्क, ग्लोब र भोकको चपेटामा परेका नागरिकलाई राहत पुगोस् भन्ने उद्देश्यले सहयोग गरिएको बताइ। एनसिसी बैंक सुर्खेतका शाखा प्रबन्ध शिव सापकोटाले कोरोना प्रतिकार्य गर्नु दायित्व सम्झेर साथ दिइएको बताए।

उक्त चेक ग्रहण कार्यक्रममा कानूनमन्त्री भण्डारी, आर्थिक मामिला तथा योजनामन्त्री प्रकाश ज्वाला, सामाजिक विकासमन्त्री दल रावल, भूमि व्यवबस्था, कृषि तथा सहकारीमन्त्री बिमला केसी र उद्योग, पर्यटन, वन तथा वातावरणमन्त्री नन्दसिंह बुढा तथा प्रदेश सरकारका प्रमुख सचिव टेकनारायण पाण्डेको सहभागिता रहेको थियो ।