काठमाडौं। अमेरिकी राष्ट्रपति डोनाल्ड ट्रम्पले चीनमा कोरोनाभाइरबाट मर्नेहरुको वास्तविक संख्या कैयौं धेरै भएको दावी गरेका छन् । शुक्रबार एक ट्वीट गर्दै उनले भने ‘यो अज्ञात शत्रुबाट भएका मत्युको संख्या चीनले अचानक बढाएर दोब्बर बनाएको त । तर, यो संख्या योभन्दा कैयौं बढी छ । यो अमेरिकामा भएका मृत्युको संख्याभन्दा पनि कैयौं बढी छ ।’

यसअघि शुक्रबार चीनले कोरोनाभाइरसका कारण हुबेइ प्रान्तको वुहानमा भएका मृत्युको संख्या ५० प्रतिशतसम्म बढाएको थियो । अधिकारीहरुका अनुसार थप १२९० जनाको मृत्यु कोरोनाभाइरसका कारण भएको हो । यसको साथमा हुबेइमा भएको मृत्युको संख्या ३८६९ पुग्यो र चीनमा भएका मृत्युको संख्या ४६०० सम्म पुग्यो ।

अधिकारीहरुका अनुसार जेलहरु र मुर्दाघरहरुमा मृत्युको सम्बन्धमा राखिएका रिपोर्टमा जो नयाँ तथ्यांक पाइएका छन् त्यसैको आधारमा नयाँ तथ्यांक जारी गरिएको हो । जोन्स हप्किन्स युनिभर्सिटीका अनुसार चीनमा अहिलेसम्म कोरोना संक्रमणका करिब ८४ हजार केस सार्वजनिक भएका छन् ।