भैरहवा । बन्दाबन्दीको समयमा भैरहवा भन्सार कार्यालयबाट हरियो तरकारी र फलफूलको आयात उच्च देखिएको छ । गत चैत ११ देखि वैशाख ११ गतेसम्म ३१ दिनको अवधिमा ६२ करोड ८५ लाख ९८ हजार बराबरको तरकारी तथा फलफूल आयात भएको भन्सार कार्यालयको तथ्याङ्कले देखाएको छ । गत आर्थिक वर्षको सोही अवधिमा ५० करोड ८९ लाख २३ बराबरको आयात भएको थियो ।

बन्दाबन्दीको ३१ दिनको अवधिमा २५ लाख ९९ हजार मूल्यको २ सय ४२ मेट्रिकटन मात्रै हरियो सागसब्जी भारतबाट आयात भएको छ । गत वर्षको यही अवधिमा आयात भएको भन्दा ३१ टन बढी हो । गत आव २०७५÷७६ को चैत ११ देखि वैशाख ११ सम्मको अवधिमा २२ लाख ७७ हजार मूल्यको २ सय ११ मेट्रिकटन हरियो सागसब्जी भारतबाट आयात भएको थियो ।

प्याजको आयात पनि बन्दाबन्दीको अवधिमा बढी भएको छ । गत आव २०७५÷७६ को चैत ११ देखि वैशाख ११ सम्ममा ५ लाख १८ हजार मूल्य बराबरको चार मेट्रिकटन प्याज आयात भएको थियो । चालू आवको चैत ११ देखि वैशाख ११ सम्म २१ करोड ३४ लाख ७९ हजार बराबरको ५ हजार ८ सय ५ मेट्रिकटन आयात भएको भैरहवा भन्सार कार्यालयले जनाएको छ । जुन गत वर्षभन्दा ५ हजार ८ सय १ मेट्रिकटन बढी हो ।

बन्दाबन्दीमा गोलभेडाको आयात पनि बढी भएको देखिएको छ । गत आवको चैत ११ देखि वैशाख ११ सम्म १ करोड ६८ लाख ७ हजार मूल्य बराबरको १ हजार ५ सय ६० मेट्रिकटन आयात भएकामा चालू आर्थिक वर्षको चैत ११ देखि वैशाख ११ सम्म २करोड ४० लाख ६ हजार मूल्य बराबरको २ हजार २ सय ६८ मेट्रिकटन आयात भएको भैरहवा भन्सार कार्यालयका प्रमुख भन्सार अधिकृत कमलकुमार भट्टराईले जानकारी दिए। यो गत आवभन्दा ७ सय ८ मेट्रिकटन बढी हो ।

“स्थानीय तरकारी तथा फलफूलको बजारीकरण नभएकाले भारतबाट आउने तरकारी तथा फलफूलको आयात उच्च भएको हो”, उनले भने। आलु गत आवको चैत ११ देखि वैशाख ११ सम्म १० करोड १६ लाख १९ हजार बराबरको ४ हजार ८ सय ५२ मेट्रिकटन आयात भएको थियो भने चालू आवको चैत ११ देखि वैशाख ११ सम्म १२ करोड ६३ लाख ६० हजार मूल्य बराबरका ५ हजार ६३ मेट्रिकटन आयात भएको भैरहवा भन्सार कार्यालयका सूचना अधिकारी पूर्ण लम्सालले बताए । यो गत वर्षभन्दा १ सय ७१ मेट्रिकटन बढी आयात भएको कार्यालयले जनाएको छ ।

बन्दाबन्दीको समयमा भैरहवा भन्सार कार्यालयबाट चना, काँचो नरिवल, काँचो केरा, आँप, सुन्तला, अङ्गुर, कागती, तरबुजा, मेवा, स्याउ, अनार, कटहर गत वर्षभन्दा भारतबाट अत्यधिक बढी नेपाल भित्रिएको भैरहवा भन्सार कार्यालयको सूचना शाखाले जनाएको छ ।