काठमाडौँ । साउदी अरबमा कोरोना संक्रमित नेपालीको संख्या बढ्दै गरेको नेपाली महावाणिज्यदूतावास जेद्दाले जनाएको छ । बिहीबार महावाणिज्यदूतावासले एक सूचना जारी गर्दै साउदी अरबमा कोरोना संक्रमित नेपालीको संख्या बढ्दै गइरहेको जनाएको हो ।

सूचनामा महावाणिज्यदूतावास जेद्दाले आफ्नो कार्यक्षेत्रमा मात्रै २६ जना नेपाली कोरोना भाइरसबाट संक्रमित भएको उल्लेख गरेको छ । संक्रमित नेपालीको विवरण महावाणिज्यदूतावासले फोनबाट संक्रमित व्यक्ति स्वयंसँग, सोही कम्पनीमा कार्यरत अन्य सहकर्मीसँग, कम्पनीको पिआरओसँग तथा उपचाररत अस्पतालका सम्बन्धित चिकित्सकबाट प्राप्त गरेको जनाएको छ ।

संक्रमितमध्ये १ जना उपचारपछि निको भएका छन् भने २५ जना उपचाररत रहेको जनाइएको छ । उपचाररतमध्ये १ जनाको गम्भीर अवस्था रहेको बताइएको छ ।

नेपाली महावाणिज्यदूतावास जेद्दाको कार्यक्षेत्र भित्र मक्का, मदिना जेद्दा, आभा खमिस, असिर, जिजान, नजरान पर्दछन् । यसअघि अन्य क्षेत्रमा पनि केही नेपाली संक्रमित भएका थिए ।