काठमाडौं। कोरोनाभाइरसको महामारीका कारण काम गुमाएर पैसाको अभाव झेलिरहेकी महिलाबाट घरको अफर दिएर यौनजन्य फाइदा उठाउन खोज्ने एक व्यक्ति पक्राउ परेका छन् । ती व्यक्तिले आफूसँगै आफ्नो घरमा बस्न चाहने महिलालाई यौनको बदलामा सित्तैमा बस्ने अफरसहित विज्ञापन नै दिएका थिए । इन्डिपेन्डेन्टको समाचार अनुसार लंग आइल्याण्डका ती व्यक्तिले आफ्नो नाम ‘एड्डी’ लेखेर क्रागलिस्टमा ‘सब्मिसिभ (आफ्नो लाभका लागि यौनको लागि तयार हुने) महिलाको लागि कोठा शेयरिङ’को अफर दिएका थिए ।

उनले २० देखि ५० वर्ष उमेरमा ‘एसएम’ जीवनशैली भएका महिलाका लागि सुरक्षित आवास दिने बताएका थिए । यो विज्ञापन देखेपछि अमेरिकी समाचार तथा डकुमेन्ट्री उत्पादक संस्था इनसाइड एडिसनकी एक निर्मात्री एलिसिया पावर्सले ती व्यक्तिको लागि सम्भावित महिला बनेर उनीसँग सम्पर्क गरेकी थिइन् ।

एड्डीले उनलाई त्यसको जवाफ दिँदै विस्तृतमा कुरा गर्न स्थानीय मोटेलमा बोलाए । एलिसिया उनलाई भेट्न गइन् । उनको साथमा उनको सानो टिम थियो । ती व्यक्तिसँग भेटेपछि उनले आफूलाई चिनाइन् । त्यसपछि भने ती व्यक्तिले आफूले यो सब यौनजन्य फाइदाका लागि नगरेको स्पष्टीकरण दिएका थिए । पछि ती व्यक्तिले एलिसियालाई माफी माग्न र आफू इमान्दार व्यक्ति भएको बताउन फोन गरेका थिए ।