काठमाडौं। अमेरिकाको उटाह राज्यमा ५ वर्षका एक बालक एसयूभी कार चलाइँदै हाइवेमा गइरहेका बेला पुलिले फेला पारेको छ । पाँच वर्षीय बालक एड्रियनले पुलिसलाई बताएअनुसार उनी आफ्ना अभिभावकको कार लिएर क्यालिफोर्निया जानको लागि हिँडेका थिए । क्यालिफोर्निया गएर स्पोर्टिङ कार लम्बोर्गिनी किन्ने उनको योजना थियो ।

लेन मिच्दै अघि बढेका उनले निकै कम गतिमा गाडी चलाएका थिए । उनी जुन हाइवेमा थिए त्यहाँ गाडी ७० माइल प्रतिघण्टाको औसत गतिमा हिँड्छन् तर उनको कार भने ३२ माइल प्रतिघण्टाको गतिमा मात्र थियो । पुलिसले उनलाई रोकेर उनलाई सोधेपछि एड्रियनले आफू लम्बोर्गिनी किन्न हिँडेको बताए। उनले आफ्नी आमालाई गाडी किन्न भनेको तर आमाले नमानेपछि आफैं गाडी किन्न हिँडेको बताए । उनले आफ्नो लागि लम्बोर्गिनी कार किन्न भनेर हिँडेका थिए । तर उनको साथमा तीन डलर मात्र भएको पुलिले बताएको छ ।