काठमाडौं। बाहिरबाट आएपछि गाउँमा संक्रमण फैलिन सक्ने आशंकामा क्वारेन्टाइनमा राखिएका छोराले क्वारेन्टाइनको अवधि पूरा नहुँदै घर आउन खोजेपछि पिताले छोराकै हत्या गरिदिएका छन् । आज तकका अनुसार भारतको मध्य प्रदेशको बालाघाटका ती पिताले चाँडै घर आउन खोजेका छोरालाई नआउन भनेका थिए तर छोराले नमानेपछि पिताले लाठीले कुटेर छोराहो हत्या गरिदिएका हुन् ।

आरोपी पिता भीमालाललाई बुधबार गिरफ्तार गरिएको छ । उनका छोरा टेकचंद केही दिन पहिले हैदराबादबाट फर्केका थिए । मृतकका भाइ रुपचंदका अनुसार टेकचंद फेब्रुअरीमा मजदूरीका लागि हैदराबाद गएका थिए । लकडाउन भएपछि उनी त्यहाँबाट अन्य मजदूरहरुसँग पैदल घर आएका थिए । १ मेका दिन उनीहरु बैहर पुगेका थिए । त्यहाँ १ दिन क्वारेन्टाइमा राखियो त्यसपछि गाउँ पंचायत कुगांवमा २ दिन क्वारेन्टाइनमा राखियो । त्यसपछि होम क्वारेन्टाइनमा बस्न भनेर पठाइयो ।

३ मेका दिन टेकचंद घर पुगे । तर, पिता भीमालालले अझै केही दिन गाउँकै क्वारेन्टाइन सेन्टरमा बस्न भने । यही कुरामा विवाद भयो र पिता भीमालालले टेकचंदको टाउकोमा लाठीले तीन–चार पटक हिर्काए । यसबाट टेकचंद गम्भीर घाइते भए । उनलाई बैहर अस्पतालमा भर्ना गरिएकोमा त्यहीँ उनको मृत्यु भयो ।