काठमाडौँ । कोरोना भाइरस (कोभिड १९) को केन्द्रबिन्दु बनेको संयुक्त राज्य अमेरिकामा पछिल्लो २४ घण्टामा ज्यान गुमाउनेको संख्या ह्वात्तै घटेको छ ।

२४ घण्टामा अमेरिकामा ७५० जना कोरोना संक्रमितको ज्यान गएको वल्डोमिटरले जनाएको छ । यो ज्यान गुमाउनेको संख्या अघिल्लो दिनको तुलनामा झण्डै आधाले कमी हो । अघिल्लो दिन अर्थात शनिबार अमेरिकामा १ हजार ४२२ जनाको ज्यान गएको थियो ।

यस्तै, आइतबार अमेरिकामा कोरोना संक्रमित पनि थोरै भेटिएका छन् । २४ घण्टामा अमेरिकामा २० हजार ३२९ संक्रमित फेला परेका हुन् । शनिबार अमेरिकामा २५ हजार ५२४ संक्रमित फेला परेका थिए ।

यो समाचार तयार पार्दासम्म अमेरिकामा १३ लाख ६७ हजार ६३८ जना मानिस कोरोना संक्रमित भएका छन् । जसमध्ये ८० हजार ७८७ संक्रमितको ज्यान गएको छ।

संक्रमितमध्ये २ लाख ५६ हजार ३३६ जना उपचारपछि घर फर्किसकेका छन् ।