काठमाडौं। कोरोनाभाइरस संक्रमित ‘एक्टिभ केस’को संख्यामा नेपालले चीनलाई उछिनेको छ । मंगलबार नेपालमा उकै दिन ५७ जना संक्रमित देखिएसँगै नेपालमा कूल संक्रमितको संख्या १९१ पुगेको छ । यीमध्ये ३३ जना निको भएर घर फर्किसकेका छन् । अहिले नेपालमा ‘एक्टिभ केस’ १५८ जना छन् ।

भाइरसको इपिसेन्टर चीनमा सुरुवाती चरणमा ठूलो संख्यामा स.क्रमण देखिएको थियो । यद्यपि अहिलेसम्म आइपुग्दा चीनले धेरै संक्रमितलाई निको पारिसकेको छ । मंगलबार दिउँसोसम्ममा चीनमा एक्टिभ केसको संख्या ११५ मात्र छ । यो नेपालको एक्टिभ केसको संख्या भन्दा ४३ कम हो ।

नेपालमा मंगलबार अहिलेसम्मकै उच्च संख्यामा एकै दिन संक्रमित भेटिएका हुन् । स्वास्थ्य तथा जनसंख्या मन्त्रालयका अनुसार, पर्सामा मात्रै ३९ जना थपिएका छन् । थपिएका संक्रमित सवै पुरुष हुन् । कपिलवस्तुमा ८, रुपन्देहीमा ९ र बारामा एक जनामा संक्रमण पुष्टि भएको मन्त्रालयले जनाएको छ । यो सँगै, नेपालमा संक्रमित संख्या १९१ पुगेको छ । यस मध्ये ३३ जना बिरामी निको भएर घर फर्किएका छन् ।