काठमाडौं। विश्वकै सबैभन्दा ठूला लागूऔषध तस्कर पाब्लो एस्कोबारका भाइ रोबर्टो एस्कोबारले आइफोनको उत्पादन गर्ने कम्पनी एप्पलविरुद्ध २.६ बिलियन डलर (३ खर्ब १३ अर्ब ३६ करोड नेपाली रुपैयाँबराबर) को मुद्दा हालिदिएका छन् । ड्रग तस्करका भाइ रोबर्टो एस्कोबारका अनुसार उनको आइफोन ह्याक भएको छ । आइफोन ह्याक भएसँगै उनलाई ज्यान मार्ने धम्कीहरु आउन थालेका छन् । धम्कीपूर्ण चिठी पनि आउन थालेका छन् ।त्यसैले उनले कम्पनीविरुद्ध मुद्दा हालेका हुन् ।

अमेरिकी वेबसाइट टिएमजेडका अनुसार रोबर्टो एस्कोबारको कानुनी पत्रमा भनिएको छ कि उनले एप्पल कम्पनीविरुद्ध उति ठूलो धनराशीको केस गरेका हुन् । ह्याकरहरुले रोबर्टोको फोन ह्याक गरेपछि फेसटाइमको प्रयोग गरेर उनको ठेगाना खोजेका छन् । त्यसपछि उनलाई धम्कीपूर्ण पत्र आउन थालेका छन् । एस्कोबारका अनुसार एप्पल कम्पनीका कर्मचारीले एप्पलको फोन विश्वकै सबैभन्दा सुरक्षित फोन भन्छन् तर उनको फोन ह्याक भएपछि एप्पलको दावी फेल भएको छ ।

एस्कोबारले यसअघि आफ्नो हत्याको प्रयास भएपछि विश्वकै सबेभन्दा सुरक्षित फोन लिएको बताएका छन् । तर, त्यो फोन पनि ह्याक भएको छ । रोबर्टोको लिगल नोटिसमा बताइएअनुसार उनको सुरक्षा नभएपछि उनी अब भूमिगत भएका छन् । अब उनले कसैको सुरक्षामा चूक गरिदिएको, गलत तरिकाले आफ्नो उत्पादनलाई प्रस्तुत गरेको र मानसिक दबाब उत्पन्न गरेको आरोपमा एप्पल कम्पनीमाथि क्षतिपूर्तिसहितको मुद्दा चलाउन माग गरेका छन् ।