काठमाडौं। जर्मनीका एक व्यक्तिले अनलाइनबाट एउटा टेस्ला ब्राण्डको कार किन्न खोज्दा झुक्किएर २८ वटा कार किनेका छन् । ती व्यक्तिबाट एकैपटक २८ वटा कार अर्डर गरेपछि कम्पनी पनि छक्क परेको थियो । ती व्यक्तिले कूल १४ लाख ४ हजार यूरो (१९ करोड ८ लाख नेपाली रुपैयाँ) बराबरको कार अर्डर दिएका थिए ।

क्यानेडियन समाचार साइट ड्राइभिङ डट सीएका अनुसार ती व्यक्तिसँग फोर्ड कुगा कार थियो । उनले त्यो कार हटाएर नयाँ र अत्याधुनिक टेस्ला कार किन्न चाहेका थिए । उनले अनलाइनबाट कार किन्ने प्रक्रिया सुरु गरे । अनलाइनका सबै विवरण भरिसकेपछि उनले कन्फर्म बटनका क्लिक गरे । तर, बुकिङ कन्फर्म भएको कुनै सन्देश आएन ।

केही नभएपछि उनले फेरि कन्फर्ममा क्लिक गरे । दोस्रो पटक पनि केही आएन । उनले पटक पटक कन्फर्ममा क्लिक गर्दै गए । अन्ततः उनले कार बुकिङ कन्फर्म भएको सन्देश पाए । तर, त्यतिबेलासम्म २८ वटा कार बुकिङ भइसकेको थियो र सबैको मूल्य बराबरको पैसा उनको बैंक खाताबाट काटिइसकेको थियो ।

यो कार खरिद गर्दा १०० यूरो बराबरको रकम ‘नन रिफण्डेबल’ थियो । बुकिङ रद्द गरे पनि प्रत्येक कार बुकिङबाट १०० यूरोका दरले २८०० यूरो (३ लाख ८१ हजार नेपाली रुपैयाँ) रकम फिर्ता नपाइने थियो । टेस्ला कम्पनी आफ्नो कार बुकिङ भइसकेपछि रद्द गर्दा नन रिफण्डेबल रकम कहिल्यै फिर्ता नदिने कम्पनीको रुपमा चिनिन्छ । तर, यो घटनामा भने उसले स्थिति बुझेपछि नन रिफण्डेबल २८०० युरो पनि फिर्ता दिएको छ ।