काठमाडौं । गोरखामा टिपरको ठक्करबाट घाइते भएका नेपाली सेनाका १ जवानको मृत्यु भएको छ । गोरखाको गोरखा नगरपालिका ११ स्थित पन्ध्र किलोमा भएको दुर्घटनामा पनि नेपाली सेनाका जवान पालुङटारका पेम परियारको उपचारका क्रममा निधन भएको जिल्ला प्रहरी कार्यालय गोरखाका प्रवक्ता डिएसपी बासुदेव खतिवडाले जानकारी दिए ।

तनहुँको आँबुखैरेनीदेखि गोरखा आउँदै गरेको नेपाली सेनाको बा १ झ ५८०० नम्बरको गाडीलाई विपरित दिशाबाट गएको लु १ त ३८४६ नम्बरको टिप्परले बुधबार साँझ ५ बजे ठक्कर दिएको थियो ।

घाइते सैनिक जवान परियारको चितवनस्थित पुरानो मेडिकल कलेजमा उपचारको क्रममा मृत्यु भएको डिएसपी खतिवडाले डिसी नेपाललाई जानकारी दिए । अर्का सैनिक जवान रञ्जित रानाको उपचार भइरहेको उनले बताए।

गोरखा अस्पतालमा उपचार गराई रहेका अन्य २ जना घाइतेको सामान्य उपचारपछि घर पठाइएको छ।