लण्डन। कोरोना भाइरस (कोभिड–१९) को विश्वव्यापी महामारीका कारण अधिकांश मानिसहरु घर भित्रै लकडाउनमा बसी रहेका बेला पोर्चुगलका एक नेपाली व्यवसायी टंक सापकोटाले भने राजधानी लिस्बनका करिब १० हजार ५०० न्यून आय भएका परिवारका सदस्यहरुलाई निःशुल्क खाना खुवाएका छन्।

यो अभियानलाई सफल पार्न सापकोटाकी श्रीमती सिता सापकोटासँगै परिवारका अन्य सदस्य तथा पोर्चुगलकै अर्का नेपाली व्यवसायी लक्ष्मीप्रसाद सापकोटा लगायत १५ जनाको टोली अहोरात्र खटेको थियो। प्रत्येक वडामा पुगेर खाना तयार पारेपछि सो खाना लक्षित घर परिवारसम्म पुराउने कामको व्यवस्थापन भने सम्बन्धीत वडा कार्यालयले नै गरेको थियो। नागरिकको घरसम्म खाना पु-याउने वडाकाे अभियानलाई विभिन्न स्वयंसेवी संघसंस्था तथा व्यक्तिले पनि स्वतस्फूर्त रुपमा सहयोग गरेका थिए।

वडा कार्यालयसँगको समन्वयमा हरेक दिन लिस्बनका भिन्न भिन्न वडामा पुगेर खाना तयार पार्ने र पिज्जा बनाउन प्रयोग गरिने सामग्री तथा अँगेनो (फोर्ने) लाई हरेक दिन गाडीमा राखेर वडाले तोकिदिएको स्थानमा लगेर राख्ने गरिएको अभियानका संचालक टंक सापकोटाले बताए। यो अभियानकै लागि भनेर सापकोटाले करिब ३५ लाख नेपाली रुपैयाँ बराबरको पिज्जा बनाउने घुम्ती अँगेनो (फोर्नो) किनेर प्रयोगमा ल्याएका छन्।

‘नेपाली सेफ’ भनेर चिनिने सापकोटाले सञ्चालन गरेको ‘फोर्ने दिओरो’ रेस्टुरेन्टले बनाउने पिज्जा विश्वकै उत्कृष्ट पिज्जाको सूचीमा सूचीकृत समेत भै सकेको छ। अहिले लिस्बनका निम्न आय भएका नागरिकका लागि वितरण गरिएको पिज्जा पनि रेस्टुरेन्टमै उपलब्ध हुने स्वाद र गुणस्तरको रहेको छ।

पछिल्लो समयमा पोर्चुगलमा देखिएका संक्रमितमध्ये अधिकांश राजधानी लिस्बनकै भएपनि यस्तो जोखिमपूर्ण अवस्थामा अभियान चलाएर समाजका लागि केही योगदान गर्नसकिन्छ भन्ने उदाहरण पनि उनले देखाएका छन्। लिस्बन नगरपालिका भित्रका विभिन्न वडामा ‘घुम्ती पिज्जा रेस्टुरेन्ट’ सञ्चालन गरेका सापकोटाको सो अभियानले पोर्चुगलका सञ्चारमाध्यमको समेत ध्यान खिचको छ।

डिसी नेपालसँग कुरा गर्दै सापकोटाले भने, “कोरोना संक्रमणका बेलासम्बन्धित वडाले तयार पारेका न्यून आय भएका मजदुरहरुको सूचीलाई नै आधार बनाएर हामीले उनीहरुलाई बेलुकाको खाना अर्थात् पिज्जा र जुस वितरण गर्यौं। लिस्बनमा सबैभन्दा धेरै कोरोना संक्रमित देखिइरहेका बेला आवश्यक सबै सुरक्षा सावधानी अपनाएर हामीले अभियान सञ्चालन गरेका हौँ।“

अभियानको संयोजन गरिरहेको लिस्बन नगरपालिकाले सापकोटाको यो अभियानको प्रशंसा गरेको छ। नगरपालिका अन्तर्गतको सामाजिक उत्तरदायित्व विभाग हेर्ने लिस्बनका उपमेयर कार्लोस कास्ट्रोलगायतको टोलीपनि हरेक दिनपिज्जा बनाइएको स्थानमा पुगेर सापकोटा नेतृत्वको टोलीले गरिरहेको कामलाई अनुगमन गरेका थिए।

उपमेयर कार्लोसले भने, ‘बहुसांस्कृतिकर बहुभाषिक मानिसहरुको बसोबास रहेका लिस्बनभित्र यो कठिन अवस्थामा एकजना नेपालीव्यवसायीले शुरु गरेको सामाजिक अभियानबाट सिँगो नगरपालिका हर्षित छ। हामीले नगरपालिकाकोतर्फबाट नागरिकहरूका लागि आवश्यक प्रबन्ध त मिलाएकै छौं तर, एउटा व्यक्तिले मात्रै चाह्यो भने पनिसमाजका लागि धेरै गर्न सक्दछ भन्ने यो एउटा अद्भूत उदाहरण हो।’

साढे २ दशकदेखि राजधानी लिस्बनलाई कर्मथलो बनाएर रेस्टुरेन्ट व्यवसाय सञ्चालन गर्दै आएका सापकोटाले ‘हामी एक्लैले संसारै बदल्न तसक्दैनौं, तर संसार बदल्न सहयोग गर्न सक्छौं’ भन्ने सकारात्मक सन्देश प्रवाह गर्नका लागि समाजसेवाको यो अभियान अघि बढाएको बताए।

१० हजार भन्दा बढी नागरिकलाई रेस्टुरेन्टमै पाइने गुणस्तर र स्वादको पिज्जा खुवाउँदा कति खर्च भयो भन्ने जिज्ञासामा सापकोटाले भने, –‘खर्चको हिसावले यो निक्कै खर्चिलो र अहिलेको अवस्थामा जोखिमपूर्ण कामहो, तर यहाँ खर्चभन्दा पनि समाजप्रतिको उत्तरदायित्व महत्वपूर्ण विषय हो। त्यही काम मैले गरेको हुँ।’

गत जुन १६ तारिखबाट शुरुभएको यो अभियान जुलाई १६ तारिखका सम्पन्न भएको छ। यो अभियानमा झन्डै नेपाली एक करोड रुपियाँ बराबर खर्च भएको अनुमान गरिएको छ।

पोर्चुगलमा ४ वटा रेस्टुरेन्ट सञ्चालनमा ल्याएका (फोर्नो दोरो, कोमे प्रिमा, काजा नेपालेसा, इल मेर्कातो) व्यवसायी सापकोटाले विगतमा पनि आफ्ना रेस्टुरेन्टहरुका माध्यमबाट नेपाललगायतविभिन्न देशहरुका नागरिकहरुलाई सामाजिक उत्तरदायित्व अन्तर्गत विभिन्न सहयोग गर्दै आइसकेका छन्।