काठमाडौं। पश्चिमी देशहरुको तुलनामा धेरै असरदार भ्याक्सिन बनाएको दावी गरेको रुसको गेमालिया इन्स्टिच्युट अफ इपिडिमियोलोजी एण्ड माइक्रोबायोलोजीले आफ्नो प्रविधि साझा गर्ने प्रस्ताव गरेको छ । यसलाई बेलायतले लगाएको आरोपको सन्दर्भसँग जोडेर हेरिएको छ । बेलायतको नेशनल साइबर सेक्युरिटी सेन्टरले रुसी ह्याकरहरुले बेलायत, अमेरिका र क्यानडाका प्रयोगशालाबाट भ्याक्सिनको प्रविधि चोरी गर्ने कोसिस गरेको आरोप लगाएको थियो । रुसले यसलाई आधारहीन भनेको थियो ।

गेमालियाका प्रमुख अलेक्जेण्डर जिन्सबर्गले भने ‘रुसी प्रविधि दुर्लभ छ । यसको पेटेन्ट गराइएको छ । म दावीका साथ भन्न सक्छु यो पश्चिमी देशहरुको तुलनामा धेरै प्रभावकारी छ । विश्वले हाम्रो इम्युनाइजेशन स्किमको कदर गर्नेछ र हामीसँग सापटी लिनेछ ।’ उनले आफू भ्याक्सिन सम्बन्धी डाटालाई पश्चिमी देशका वैज्ञानिकहरुसँग साझा गर्न इच्छुक भएको पनि बताए । उनका अनुसार यो त्यो प्रविधि हो जो रुसले २५ वर्षदेखि कोरोनाभाइरसको लागि विकास गरिरहेको छ ।

गेमालियाको भ्याक्सिनको यसअघि नै रुसका दुई संस्थानमा क्लिनिकल ट्रायल चलिरहेको छ । विश्व स्वास्थ्य संगठनले गेमालियाका अलावा विश्वका अन्य २२ संस्थाहरुलाई आफ्नो निगरानीको सूचीमा राखेको छ जसलाई तीन चरण पूरा गरेपछि ठूलो परिमाणमा उत्पादनको अनुमति दिन सकिनेछ ।