काठमाडौं। कोरोना भाइरसबाट विश्वभर १ करोड ४५ लाख ६९ हजार २ सय ७२ जना संक्रमित भएका छन्। ती मध्ये ८६ लाख ९७ हजार ४५७ जना उपचारपछि निको भएका छन् भने ६ लाख ७ हजार १६७ जनाको मृत्यु भएको छ। आइतमारमात्रै १ लाख ५४ हजार नयाँ संक्रमित थपिएका थिए। तीमध्ये सबै भन्दा ८४ हजार अमेरिका र भारतमा मात्रै थपिएका हुन्।

अमेरिकामा पछिल्लो २४ घण्टामा ४४ हजार ३६८ जना संक्रमित थपिएका छन् भने भारतमा ४० हजार २ सय ४३ जना संक्रमित थपिएका छन्। यसअघि शनिबार विश्व स्वास्थ्य संगठनले विश्वभर २४ घण्टामा दुई लाख ५९ हजार ८४८ जना संक्रमित थपिएको जनाएको थियो।

यसअघि ५ जुलाईमा २४ घण्टामा २ लाख १२ हजार ३२६ संक्रमित थपिएका थिए। ती मध्ये सबैभन्दा धेरै अमेरिकाका थिए। डब्ल्यूएचओका अनुसार अमेरिका बाहेक ब्राजील, भारत र दक्षिण अफ्रिकामा कोरोना संक्रमित तीव्र गतिमा बढिरेहेको छ। ब्राजीलमा अस्पतालको अभाव हुन थालेको छ।

यसैबीच इजराइलमा पछिल्लो २४ घण्टामा नौ जनाको मृत्यु भएको छ। शनिबार इजराइलमा १ हजार ९ सय ६ जनामा संक्रमण देखिएको थियो। इजराइलमा कुल संक्रमितको संख्या ४९ हजार ५७५ छ। २१ हजार ४४० संक्रमित उपचारपछि निको भएका छन्।