काठमाडौं । बिहिबार उपत्यकामा २ सय सहित ७ सय ७ जना थप कोरोनाका संक्रमित थपिएका छन्। स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले नियमित पत्रकार सम्मेलनमार्फत कोरोनाका ७०७ संक्रमित थपिएको जानकारी दिए।

प्रवक्ता डा. गौतमका अनुसार काठमाडौं जिल्लामा १७४ जना, भक्तपुरमा ८ जना र ललितपुरमा १८ जना गरी काठमाडौं उपत्यकामा थप २ सय जनामा कोरोना संक्रमण पुष्टि भएको हो। नेपालभर कोरोनाबाट संक्रमित हुनेको संख्या २९ हजार ६४५ पुगेको छ।

हालसम्म १७ हजार ९ सय ६४ जना डिस्चार्ज भएका छन् भने गत २४ घण्टामा २६४ जना डिस्चार्ज भएको स्वास्थ्य तथा जनसंख्या मन्त्रालयले जनाएको छ। नेपालमा हालसम्म सक्रिय संक्रमितको संख्या ११ हजार ५५५ रहेको छ।

मन्त्रालयका अनुसार गत २४ घण्टामा थप ६ जनाको मृत्यु भएको छ भने मृत्यु हुनेको संख्या १ सय २६ पुगेको छ। गत २४ घण्टामा ११ हजार ८३२ जनाको पीसीआर विधिबाट कोरोनाको परीक्षण गरिएको पनि मन्त्रालयले जनाएको छ। यस्तै ११ हजार ७६८ जना क्वारेन्टिनमा रहेका छन्।