काठमाडौं। नेपाली काँग्रेसका सभापति शेरबहादुर देउवाले बुधबार पार्टीको सूचना, संचार तथा प्रचार विभागलाई पूर्णता दिएका छन्। पार्टी प्रवक्ता विश्वप्रकाश शर्मालाई यसअघि नै विभाग प्रमुख बनाइएकोमा बुधबार देउवाले विभागलाई पूर्णता दिएका हुन्। विभागको उपप्रमुख सुरेश आर्चायलाई मनोनित गरिएको छ भने सचिवमा दिनेश थापा मगरलाई मनोनित गरिएको छ।

यस्तै देउवाले विभिन्न जिल्ला तथा विदेशस्थित जनसम्पर्क समितिका ४८ जनालाई सदस्यतमा मनोनित गरेको पार्टी केन्द्रीय कार्यालयका मुख्य सचिब कृष्णप्रसाद पौडेलले जनाएका छन्।

महाधिवेशनको कार्यतालिका बनेर काम शुरु भइसकेपछि महाविधेशन प्रभावित पार्न सभापति देउवाले विभाग गठन गरेको भन्दै वरिष्ठ नेता रामचन्द्र पौडेल समुहले विरोध गर्दै आए पनि देउवाले एकलौटी रुपमा विभाग गठन गरेका हुन्।

महाधिवेशन भएको २ महिना भित्र विभाग गठन गर्नुपर्ने काँग्रेस विधानमा व्यवस्था भए पनि देउवाले आफ्नो थपिएको कार्यकालमा धमाधम विभाग गठन गरेपछि काँग्रेसमा विवाद चुलिएको छ।