काठमाडौं। अमेरिकाको रोग नियन्त्रण तथा रोकथाम केन्द्र (सीडीसी)ले राज्यका स्वास्थ्य अधिकारीहरुलाई अक्टोबर महिनाको अन्तिमसम्म उच्च जोखममा रहेका नागरिकहरुलाई भ्याक्सिन दिन तयारी गर्न निर्देशन दिएको छ । बुधबार एजेन्सीले प्रकाशित गरेका दस्तावेजमा यसको खुलासा भएको हो ।

अमेरिकामा यसरी भ्याक्सिन दिने समय निर्धारण गरिनुलाई राजनैतिक दृष्टिले हेरिएको छ किनकि आगामी नोभेम्बरमा अमेरिकामा राष्ट्रपति पदको चुनाव हुँदैछ । यस्तोमा चुनावको ठिक अगाडि भ्याक्सिन दिने मिति तोकिनुलाई राष्ट्रपति डोनाल्ड ट्रम्पको चुनाव प्रभावित पार्ने रणनीतिको रुपमा लिइएको छ ।

केही समयअघि अमेरिकी राष्ट्रपति ट्रम्पले समयमै भ्याक्सिन ल्याउने घोषणा गरेका थिए । भ्याक्सिन गर्नको लागि अर्बौं डलरको प्रतिबद्धता गरेपछि उनले नोभेम्बरमा हुने निर्वाचनमा आफूलाई जिताउन अमेरिकीहरुसँग माग गरेका थिए । राष्ट्रपति ट्रम्प कोरोना भ्याक्सिनको विषयमा पहिलेदेखि नै सक्रिय रुपमा बोलिरहेका छन् किनकि यसले अमेरिकामा १ लाख ८० हजारभन्दा धेरैको ज्यान लिइसकेको छ ।

सीडीसीका प्रवक्ताले समाचार एजेन्सी रोयटर्ससँग कुरा गर्दै भनेका छन् ‘सीडीसीले एउटा खास तयारी गरेको छ जसअनुसार राज्यहरुलाई भ्याक्सिन वितरणको लागि भनिएको छ ताकि सम्भवतः अक्टोबर र नोभेम्बरमा सीमित मात्रामा भ्याक्सिन दिन सकियोस् ।’ यसअघि न्यूयोर्क टाइम्सले पनि सीडीसीले ५० राज्य र ५ ठूला शहरका अधिकारीहरुसँग यसबारेमा सम्पर्क गरेको समाचार छापेको थियो ।

अमेरिकाका शीर्ष संक्रामक रोग विशेषज्ञ डा. एन्थोनी फाउसीले बुधबार कोभिड १९ का कैयौं भ्याक्सिनको ट्रायल फरक फरक चरणमा रहेको बताएका थिए । उनले ट्रायल पूरा नभइसकेकोले भ्याक्सिन कति प्रभावकारी छ भन्ने जानकारी नोभेम्बर–डिसेम्बरसम्म आउने बताएका थिए । सीडीसीले भने अक्टोबरसम्म अमेरिकामा एक वा दुई भ्याक्सिन उतार्ने तयारी गरेको छ । यसको मात्रा सीमित भए पनि भ्याक्सिन दिने तयारी तीब्र रुपमा चलिरहेको छ ।