काठमाडौं। नेपाल परिवार दलका अध्यक्ष एवम् पूर्व मन्त्री एकनाथ ढकालले विजया दशमीका अवसरमा स्वदेश तथा विदेशमा रहेका सम्पूर्ण नेपालीमा शुभ–कामना व्यक्त गरेका छन्।

ढकालले जारी गरेको शुभकामना सन्देशमा कोभिड–१९ को संक्रमणप्रति सचेतता अपनाउन तथा मास्क अनिवार्य लगाउन र भौतिक दूरी कायम राख्न आग्रह गदै सामाजिक सांस्कृतिक पर्व मनाउँदा आफू र आफ्नो परिवारलाई सुरक्षित राख्न आवहान् गरेका छन्।

दशैँ, तिहार, नेपाल संवत् र छठ पर्वका अवसरमा शुभकामना दिँदै ढकालले सम्भव भएसम्म आफू बसोबास गरिरहेका स्थानमा नै चाडपर्व मनाउन आग्रह गरेका छन्।

पूर्वमन्त्री ढकालले प्राकृतिक विपत्ति र कोरोना भाइरसका कारण ज्यान गुमाएकाप्रति श्रद्धाञ्जलि अर्पण गर्दै परिवारजनमा समवेदना व्यक्त गरेका छन्। चाडपर्व नेपाली संस्कृतिका मौलिक विशेषता भएको उल्लखे गर्दै उनले बहुजातीय, बहुभाषिक, बहुधार्मिक र बहुसांस्कृतिक विशेषतायुक्त मुलुकमा मनाइने चाडपर्वले विविधताबीचको एकता, सामाजिक सद्भाव कायम राख्ने बताएका छन्।

अध्यक्ष ढकालले दशैँका बेलामा पनि कोरोना भाइरस रोकथाम, नियन्त्रण तथा उपचारका लागि अग्रभागमा खटिनु भएका स्वास्थ्य र सुरक्षाकर्मी तथा सबैमा सम्मान व्यक्त गर्दै उनले पर्वका समयमा अस्पतालको शय्या तथा आइसोलेशनमा रहेका सङ्क्रमित छिट्टै कोरोनामुक्त हुने र उनहरुको आगामी दशैँ उल्लासमय हुने अपेक्षा व्यक्त गरेका छन्।