काठमाडौं। गैरआवासीय नेपाली संघ (एनआरएनए)ले बोलाएको विशेष अधिवेशन रोक्न माग गर्दै एनआरएनए अभियन्ताहरुले परराष्ट्रमन्त्री प्रदीप ज्ञवालीलाई पत्र लेखेका छन्। आईसीसी पाँच सदस्यहरु स्पेनका चिन्तामणि सापकोटा, संयुक्त राज्य अमेरिकाका शंकर खड्का, अष्ट्रेलियाका दीपक शर्मा, जर्मनीका विजय मोक्तान र अफ्रिकाका क्षेत्रीय सदस्य रोशन थापाले संयुक्त पत्र लेख्दै परराष्ट्रमन्त्रीको ध्यानाकर्षण गराएका हुन्।

गत २२ नोभेम्बरमा बसेको एनआरएनएको ७५औँ अन्तर्राष्ट्रिय समन्वय परिषद् बैठकमा अध्यक्ष कुमार पन्तले २३ र २४ जनवरी २०२१ मा संघको विशेष महाधिवेशन गर्न प्रस्ताव राखेका थिए। भर्चुअल रुपमै बोलाइएको उक्त महाधिवेशन एनआरएनएको विधान विपरीत भएको भन्दै उनीहरुले परराष्ट्रमन्त्रीको ध्यानाकर्षण गराएका हुन्।

त्यस्तै, विधान र परराष्ट्र मन्त्रालयको सर्तविपरीत बोलाइएको उक्त विशेष महाधिवेशनमा सहभागी नहुन उनीहरुले मन्त्री ज्ञवालीलाई आग्रह गरेका छन्। केही दिनअघि विशेष महाधिवेशन रोक्न माग गर्दै परराष्ट्र मन्त्रालयमा निवेदन दर्ता गराएका उनीहरुले मन्त्रीलाई नै पत्र लेखि महाधिवेशन रोक्न र जबरजस्ती बोलाइए सहभागी नहुन आग्रह गरेका हुन्।

‘एनआरएनएको विधान विपरीत गरिने कार्यलाई एउटा अभिभावकीय भूमिकामा रहेको परराष्ट्र मन्त्रालयले कदापी सहमति दिन मिल्दैन भन्ने हाम्रो ठम्याइ छ’, उनीहरुले पत्रमा लेखेका छन्, ‘संघको केन्द्रीय समितिको आधिकारिक निर्णय बिना नै नयाँ प्रतिनिधि (डेलिगेट्स)हरु नियुक्त गरेर विशेष महाधिवेशनमा सहभागी गराउन लागिएको छ, जुन सर्वथा अनुचित र विधान विपरीत छ।’

साथै, उनीहरुले परराष्ट्र मन्त्री विशेष महाधिवेशनमा सहभागी भए विदेशमा रहेका नेपालीको साझा संस्थामा राजनीतिक हस्तक्षेपको आरोप लाग्ने पनि चेतावनी दिएका छन्।