काठमाडौं। सामाजिक सञ्जालमा एक भिडियो भाइरल भइरहेको छ। महिला रोइरहेकी छन्। काठमाडौं महानगरपालिकाको नगर प्रहरीले ती महिलालाई समातेका छन्। र उनको तरकारी, फलफुल र गाडा नियन्त्रणमा लिएको भिडियोमा देख्न सकिन्छ। ती अधवैंशे महिला नगरप्रहरीले गाडा र सामान जफत गरेपछि रोइरहेको भिडियोमा देखिन्छ। नगरप्रहरीले गरेको यो घटनाको कसैले मोबाइलबाट भिडियो बनाएर समाजिक सञ्जालमा पोस्ट गर्यो।

मंगलबार दिउँसो काठमाडौंको सुकेधारामा भएको यो घटनाको भिडियो बिहीबार सामाजिक सञ्जालमा भाइरल भइरहेको छ। र भिडियो शेयर गर्दै सामाजिक सञ्जाल प्रयोगकर्ताहरुले सरकारसँग यी महिलामाथि ज्यादती भएको भन्दै प्रश्न गरिएको छ।

सामाजिक सञ्जालमा यो भिडियो भाइरल बनेपछि डिसी नेपालले यो विषयमा काठमाडौं महानगरपालिकासँग यो विषयमा जिज्ञासा राख्यो। महानगरका प्रवक्ता ईश्वरमान डंगोलले फुटपाथमा व्यापार गरेकाले नगरप्रहरीले त्यसलाई उठाएको जानकारी दिए। उनले डिसी नेपालसँग भने, ‘महानगर क्षेत्रमा फुटपाथमा व्यापार गर्न पाइँदैन। त्यो सबैलाई जानकारी भएको विषय हो। फुटपाथमा व्यापार गर्न कसैलाई पनि छुट दिन सकिँदैन। अहिले यो भिडियो भाइरल भएपछि महानगरको आलोचना भएको छ।’

मेरो देशमा यी आमाको आँसु पुछ्ने लोकतन्त्र कहिले आउला हे बरै। यिनको निम्ति आन्दोलन कहिले होला? video: social sites pic.twitter.com/wW6qvO73wy

— लक्ष्मण श्रेष्ठ (@lakxhmanshresth) January 14, 2021

महानगरले फुटपाथ व्यापारलाई व्यवस्थित बनाउन केही विकल्प सोचिरहेको उनले बताए। गत वर्ष नै योजना बनाइएको भए पनि कोरोनाका कारण कार्यान्वयन गर्न नसकिएको बताए।

उता ती महिलालाई नियन्त्रण लिएको विषयमा जानकारी दिँदै महानगर प्रहरीका प्रमुख डीएसपी धनपति सापकोटाले महानगरको कानून कार्यान्वयन गरिएको बताए। उनले डिसी नेपालसँग भने, ‘ती महिलालाई पटक पटक चेतावनी दिएका थियौं। अटेर गरेपछि गाडा उठाएका हौं।’ उनले गाडा महानगरले जफत गरेको तर, तरकारी र फलफुल भने फिर्ता गरेको बताए।

ती महिलाबारे थप जानकारी पाउन भने सकिएको छैन।