काठमाडौं। हजुरबुवा भइसकेका ६० वर्षका एक वृद्धले दोस्रो विवाह गर्न नपाएपछि ११ किलोभोल्ट विद्युत प्रसारण लाइनको पोलमा चढेर नौटंकी गरेका छन् । पाँच सन्तानका पिता यी व्यक्तिले विद्युतको पोलमा चढेर आत्महत्याको प्रयास गरेका थिए । भारतको राजस्थानको धौलपुर जिल्लाका यी व्यक्तिले अर्की एक वृद्ध महिलासँग विवाह गर्न खोजेको भारतीय मिडियाले जनाएका छन् । यी व्यक्तिले बिजुलीको पोलमा चढेर आत्महत्याको धम्की दिएर आफ्ना छोराछोरीहरुलाई विवाहको लागि राजी बनाउन दबाब दिएका थिए ।

उनी पोलमा चढेको खबर गाउँमा फैलिएपछि त्यहाँ हल्लाखल्ला भयो । यी वृद्धले पोलमा चढेर हाइटेन्सल लाइनको तार समेत समातेका थिए तर संयोगले त्यतिबेला त्यहाँ लाइन नभएकोले उनलाई केही भएन । उनी पोलमा चढेको थाहा पाएपछि परिवारले तत्कालै यसको सूचना विद्युत सब स्टेशनका कर्मचारीलाई दिएका थिए र कर्मचारीले तत्कालै लाइन काटिदिएका थिए । परिवार र गाउँलेले धेरै सम्झाएपछि मात्रै ती व्यक्ति तल ओर्लिएका थिए ।

घटना आइतबारको भएको बताइएको छ । यी व्यक्तिकी पत्नीको ४ वर्ष पहिले मृत्यु भइसकेको छ । उनका तीन छारा र २ छोरी छन् । पाँचै छोराछोरीको विवाह भइसकेको छ र उनकानातिनातिनी पनि छन् । वृद्ध केही दिन अघिदेखि दोस्रो बिहे गर्न जिद्दी गरिरहेका थिए तर छोराछोरी तयार नभएपछि घरमा झगडा भएको थियो । झगडापछि रिसाएर हिँडेका ती व्यक्ति खेतमा भएको पोलमा चढेका थिए ।