काठमाडौं। एमाले संसदीय दलका नेता तथा प्रधानमन्त्री केपी शर्मा ओलीले भोलि बिहानको लागि बोलाएको पार्टीको संसदीय दलको बैठकमा माधव नेपाल समूह सहभागी नहुने भएका छन् । माधव नेपाल समूहले आफूहरुको राष्ट्रिय कार्यकर्ता भेला जारी रहेकोले संसदीय दलको बैठकमा जान नभ्याउने बताएका छन् ।

भोलि बिहान ११ बजे बालुवाटारमा बस्ने गरी संसदीय दलको बैठक बोलाइएको छ । संसदीय दलका प्रमुख सचेतक विशाल भट्टराईले समसायिक परिस्थितिबारे, संसद्लाई कसरी प्रभावकारी बनाउने भन्ने र पार्टीको समस्याहरूलाई कसरी निराकरण गर्ने भन्नेबारे संसदीय दलको बैठकमा छलफल हुने बताएका छन् । पार्टीभित्र विवाद हुँदा संसदमा त्यसको प्रभाव परेकोले संसदमा पार्टी एक ढिक्का भएर जानेबारे बैठकमा छलफल हुने उनले बताए ।