काठमाडौं। पर्यटन विभागले किर्तिमानी आरोही कामिरिता शेर्पालाई देशकै पहिलो पर्वतीय पथप्रदर्शक (माउन्टेन गाइड) को अनुमति पत्र प्रदान गर्दै माउन्टेन गाइडहरुलाई अनुमति पत्र दिने प्रक्रिया सुरु गरेको छ । पर्यटन विभागले पर्वतीय पथप्रदर्शकहरुलाई परिचय पत्र वितरण प्रक्रिया सुरु गरेको र कामिरिता परिचय पत्र पाउने पहिलो पथप्रदर्शक भएको विभागकी निर्देशक मिरा आचार्यले बताइन् ।

नेपाली पर्वतीय पर्यटनलाई व्यावसायिक र मर्यादित बनाउनका लागि पथ प्रदर्शक इजाजतपत्र उपलब्ध गराउन सुरु गरिएको आचार्यले बताएकी छिन् । विभागले उपलब्ध गराउने अनुमतिपत्र पाँच वर्ष अवधिको हुनेछ । विभागले अनुमतिपत्र वितरणका लागि गत चैत १ देखि अनलाइनमार्फत आवेदन माग गरेको थियो। कामी रिता शेर्पाले पहिलो नम्बरमा नाम दर्ता गराएकाले उनले पहिलो अनुमतिपत्र प्राप्त गरेको र आवेदन दिएकाहरूको अनुमतिपत्र स्वीकृत गर्ने प्रक्रियामा रहेको पनि निर्देशक आचार्यले बताइन्।

अनुमतिपत्रका लागि दुई सयभन्दा बढीको आवेदन परेको विभागले जनाएको छ । ‘हामीले अरूको सीप र क्षमताहरू स्वीकार्यौं भने हामी एउटा राष्ट्र निर्माण गर्न सक्दछौं । सरकारले हाम्रो पर्वतारोहीहरूको पहिचान गर्न थालेको छ र पर्वतारोहणको लागि सधैँ ढोका खुला छ । हामीले यहाँबाट सुरु गर्यौं र यो जारी नै रहनेछ’ आचार्यले सामाजिक संजालमा लेखिकी छिन्। कामिरिता शेर्पाले २४ पटक सगरमाथाको सफल आरोहण गरिसकेका छन् र अब उनी २५ औं आरोहणको तयारीमा छन् ।