देउखुरी । घोराही उपमहानरपालिका जनप्रतिनिधि स्वास्थ्यकर्मीका साथ होमआइसोलेशनमा बसेका कोरोना सङ्क्रमितलाई भेट्न घरघरमा पुग्न शुरुआत गरेका छन् । घोराही उपमहानगरपालिका – १४ वडाध्यक्ष शक्तिराम डागी र सदस्य गुलाम रसुलले चिकित्सकद्वय वसन्त पुन र गिरबहादुर महरा सहित ह सङ्क्रमितका घरमा पुगी सेवा दिइरहेका छन् ।

घरदैलो अभियानमा सामान्य औषधि र स्वास्थ्य सामग्री प्रदान गरिएको डा पुनले जानकारी दिए। हालसम्म सो वडामा आठ सङ्क्रमितको मृत्यु भएको छ भने दुई सय ५५ सङ्क्रमित छन् ।

यसैगरी वडा नं १८ का अध्यक्ष भरतमणि अर्याल स्वाथ्यकर्मीको साथमा औषधि लिएर सङक्रमितका घरमा पुग्ने गरेका छन् । सङ्क्रमितलाई आइसोलेशनमा रहँदा अपनाउनुपर्ने स्वास्थ्य सुरक्षाका मापदण्ड तथा आहार लगायतका विषयमा सचेत गराइएको छ ।

उपमहानगरपलिका स्वास्थ्य शाखा प्रमुख नारायण घर्तीले उपमहानगर भित्रका १९ वटै वडामा स्वास्थ्यकर्मीलाई खटाइएको बताए । उनले सङ्क्रमितलाई स्वाथ्यकर्मीको नाम, मोवाइल नम्बर उपलब्ध गराउन र मनोबल उच्च बनाउन , जटिलता आएमा जानकारी दिन आग्रह गरे । संस्थागत क्लिनिकका प्रमुख राधा पौडेलको संयोजकत्वमा स्वास्थ्य परामर्श सेवा शुरुआत समेत गरिएको छ ।

७९ वर्षीया महिलाले जितिन् कोरोना

रामपुर अस्पतालमा उपचाररत् ७९ वर्षीया ज्येष्ठ नागरिकले कोरोना जितेर घर फर्किएका छन् । दश अघि अस्पतालमा उपचारका लागि रामपुर अस्पताल भर्ना भएका रामपुर ३ रजघराका केशमाया कंडेलले शनिबार कोरोना जितेर खुशी हुदै घर फर्किएकी हुन् । आफ्नो उपचारमा निरन्तर खटेर निको गराउने स्वास्थ्यकर्मीलाई उनले धन्यवाद दिएकी छन् । “कोरोना पोजेटिभ देखिएपछि शुरुमा धेरै डर लागेको थियो, केही दिन घरमै आइसोलेशनमा बसे, स्वास्थ्यमा थप समस्या आएपछि अस्पताल भर्ना भए, मेरो उपचारमा डाक्टरहरुले धेरै खटेर सन्चो बनाउनुभयो, अहिले म आफुलाई बिरामी हुँ जस्तो पनि लाग्दैन” उनले खुशी हुँदै भनिन् ।

पोजेटिभ देखिएपछि होम आइसोलेशनमा रहेकी उनी स्वास्थ्यमा समस्या देखिएपछि अस्पतालमा भर्ना गरिएको र अहिले निको हुदै गएपछि आज घर पठाइएको कोभिड फोकल पर्सन डाक्टर बासुदेव सुवेदीले जानकारी दिए । हाल रामपुर अस्पतालको कोरोना अस्पतालमा पाँच बिरामी उपचाररत रहेको र सबैको स्वास्थ्य अवस्था सामान्य रहेको जनाइएको छ । हालै सो अस्पतालमा भर्ना भएका एक सङ्क्रमितको निधन भएको थियो । रासस