लण्डन। लण्डन अन्तर्राष्ट्रिय बाग्लुङ समाजले जिल्लाका विभिन्न स्थानीय तहमा कोरोना रोकथाम र नियन्त्रणका लागी सहयोग पुग्ने स्वास्थ सामाग्री वितरण गरेको छ।

विश्वभर छरिएर रहेका बाग्लुङबासीहरूलाई एकजुट गराएर आफ्नो जिल्लामा केहि गर्न सकिने विश्वासका साथ स्थापना गरिएको समाजका अध्यक्षमा निर्विरोध रुपमा स्पेनमा नेपाल सरकारको पर्यटनदूत रुपमा समेत रहेका एकराज गिरी छन्।

दुई चरणमा वितरण गरिएका स्वास्थ सामाग्रीहरूमा स्यानिटाईजर, ग्लबस्, पिपिई सेट, थर्मोमाटर, अक्सिमिटर लगायतका करीब १७ लाख रुपैयाँ बराबरको स्वास्थ्य सामग्री वितरण गरिएको छ।

विभिन्न देशमा गठन भएका बाग्लुङ समाजको संस्थागत र व्यक्तिगत रकम गरी रकम संकलन अभियानबाट दुई चरणको सामाग्री वितरण गरिएको र परिस्थिति अनुसार आवश्यक सामाग्रीहरूको स्वरूप फेर्न पर्ने भएकोले थप सहयोगका लागी स्थानीय तहको आवश्यकता हेरेर केही समय भित्रै वितरण गरिने अध्यक्ष गिरिले जानकारी दिए।

समाजका अनुसार बाग्लुङ नगरपालिका १२, १३, १४ वडा तथा साविक अमलाचौर, पैयूँपाटा र नारायणस्थान, तारा खोला नगरपालिका, काथेखोला, गलकोट, निसी खोला नगरपालिका, तमानखोला गाउँपालिकालगायतका ठाउँहरुमा स्वास्थ्य सामग्री वितरण कार्यक्रम सम्पन्न भएको छ।

यसरी वितरण गरिएका सामाग्रीहरू स्थानीय जनप्रतिनिधि र स्वस्थकर्मीलाई हस्तान्तर गरिएको छ। समाजका एशिया संयोजक विष्ण चापागाईं हाल नेपालमै रहेका वितरणमा सहज भएको समाजका सचिव दिपेन्द्र आचार्यले बताए।

जिल्ला सदरमुकाम बाग्लुङ बजारमा रहेको आफ्नो घरको एउटा कोठालाई कार्यलय स्थापनाका लागि निशुल्क रुपमा दिनु भएको आचार्यले रकम संकलनका लागि अग्रसरता देखाएका थिए।

समाजको कार्यलय प्रमुखका रुपमा कार्यरत कर्मचारी सुरेन्द्र कडेंलले समानहरूको खरिद र यसको वितरणका लागी स्थानीय तहको आवश्यता अनुसार सामाग्रीहरू तयार पारी काम गरिरेका छन्।

लामो समय जापान बसेर भर्खर नेपाल फर्किएका समाजका उपाध्यक्ष बेलु थापाले त्यहाँका स्थानीय तहका जनप्रतिनिहरूलाई सम्पर्क गरी प्रारम्भिक रुपमा स्थितिको जानकारी लिएर सामान खरिदका लागी सहजीकरण गर्नु भएको अध्यक्ष गिरीले जानकारी दिए।

समाजले संस्थाका पदाधिकारीहरुसहितको एउटा समिति तयार पारेर कार्यविभाजन गरेको छ। विभिन्न देशका बाग्लुङ समाजका अध्यक्षहरूलाई सम्पर्क गरेर पनि स्वास्थ सामाग्रीको उपलब्ध गराईदिन अनुरोध गरेका कारण जिल्लामा आवश्यक भएका ठाउँमा दिन सकिएको बागलुङ समाज पोर्चुगलका अध्यक्ष प्रेम खड्काले जानकारी दिए।

बिदेशबाट बिदाको समयमा नेपाल पुगेका समाजका पदाधिकारीहरूमा जो जसले जहाँ सामाग्री पुर्याउन सहयोग गर्न सकिन्छ त्यहाँ पुर्याउन सकृया देखाएको र आँफुले समेत दुई वटा स्थानीय तहको सम्बन्धित ठाउँमै पुगेर राहत सामाग्री पुर्याएको समाजका एक पदाधिकारी कृष्ण खड्काले जानकारी दिए।

जिल्लाका स्थानीय तह बाहेक जिल्लामा कार्यरत पत्रकारहरूलाई,जिल्ला सदरमुकाममा रहेको धौलागिरी अस्पताललाई, एम्बेलेन्स चालकलाई र लास व्यवस्थापन गर्ने टीममा समेत उपलब्ध गराएको साथै समाजले जिल्ला कार्यरत अन्य परोपकारी संस्थाहरू संगको सहकार्यमा स्थानीय तहका कतिपय ठाउँमा अक्सिमिटर उपलब्ध गराई सहयोग गरेको समाजका अर्का उपाध्यक्ष दिपक गौतमले जानकारी दिए।

निकट भविष्यमा वितरण गरिने राहत तथा सहयोग सामाग्री स्थानीय तहमा आँफैले लगेर जाने योजना रहेको समाजका संरक्षक गंगा शर्माले जानकारी दिइन्।

स्थापना भएको केवल एक बर्ष मात्रै पुगेको समाजले जिल्लामा राम्रा काम गर्दै आईरहेको र निकट भविष्यमा बाग्लुङ नगरपालिका संगको सहकार्यमा टेलिमेडिसिनको कार्यक्रम मार्फत थप सेवा गर्ने योजना रहेको समाजका अर्का उपाध्यक्ष रमेश भट्टले बताए।