काठमाडौं । ‘मातृभूमिका लागी कोभिड–१९ संक्रमण प्रतिकार्य तथा उपचार व्यवस्थापन समिति जापान’ले करिब ५४ लाख बराबरको कोरोनाविरुद्ध स्वास्थ्य सामाग्री र खाद्यान्नलगायत सहयोग गरेको छ ।

नेपालमा कोरोनाको बढ्दो संक्रमणलाई मध्यनजर गर्दै सहयोगको निम्ति नेपाली दूतावास जापानको संरक्षकत्व र एनआरएनए आइसीसीका निवर्तमान अध्यक्ष तथा संरक्षक भवन भट्टको संयोजकत्वमा ‘मातृभूमिका लागी कोभिड–१९ संक्रमण प्रतिकार्य तथा उपचार व्यवस्थापन समिति जापान’को गठन भएको थियो ।

उक्त समितिको यही जुन २१ मा अन्तिम बैठक बसि विभिन्न निर्णय गर्नुका साथै समितिबाट आह्वान गरिएको सहयोग अभियान पनि बन्द भएको छ । समितिका संयोजक भट्टको अध्यक्षतामा बसेको बैठकले समितिको तर्फबाट अपिल गरिएको सहयोग क्रममा प्राप्त रकमको सम्पूर्ण विवरणसहित विभिन्न स्थान र शीर्षकमा सहयोग गर्ने निर्णय गरेको छ ।

समितिका सदस्य सचिव जनक विक्रम शाहीका अनुसार ५३ लाख ६७ हजार २ सय ११ येन संकलन भएको थियो भने सोही बराबरको रकमको सहयोग सामाग्री नेपाल पठाइएको हो ।

उक्त सहयोग रकमबाट बाल चिकित्सा आईसीयूको निर्माण विरगन्जको नारायणी अस्पतालमा गर्नको लागि आवश्यक समन्वयको जिम्मा एनआरएनए जापानका केन्द्रिय सदस्य सुरेश गिरीलाई दिइएको छ ।

संयोजक भट्ट अन्तर्राष्ट्रिय सदस्य रहेका टोकियो सिन्तोसिन रोटरी क्लबबाट प्राप्त एम्बुलेन्स धानिङ्ग जिल्लाको धुनिवेशी नरपालिकालाई उपलब्ध गराउने र उक्त एम्बुलेन्स राजमार्गमा दुर्घटना भएका स्थानहरुको लागि प्रयोग गरिने छ । यसको निम्ति धादिङ्ग समाज जापानका अध्यक्ष दिनेश लोहनीलाई जिम्मा दिइएको छ ।

त्यस्तै, ७ हजार थान वाई–कनेक्टर सबै जिल्ला अस्पताललाई वितरण गरिने छ । ७ हजार वाई–कनेक्टरले ७ हजार थान सिलिन्डर बराबरको काम गर्ने छ । नेपालमा अक्सिजन सिलिन्डरको कमी भएको अवस्थामा उक्त कनेक्टरले एउटै सिलिन्डरबाट २ ओटा बिरामीलाई अक्सिजन दिन सकिने छ ।

साथै बाँकी रकम एनआरएनए एसिया प्यासिफिकको अक्सिजन प्लान्टमा सहयोग गर्ने समितिले निर्णय गरेको छ । स्वास्थ्य सामाग्री एनआरएनए अन्तर्राष्ट्रिय समन्वय परिषदका कोषाध्यक्ष महेश कुमार श्रेष्ठलाई समितिका संयोजक भट्टले एनआरएनए जापानको कार्यालयमा हस्तान्तरण गरेका हुन् ।

केहि रकम एनआरएनए एसिया प्यासिफिकको अक्सिजन प्लान्ट निर्माणमा सहयोग गरिने जनाइएको छ । जापानबाट खरिद गरी पठाउने स्वास्थ्य सामाग्री संघका कोषाध्यक्ष महेशकुमार श्रेष्ठलाई समितिका संयोजक भवन भट्टले एनआरएनए जापानको कार्यालयमा हस्तान्तरण गरिसकेका छन् । उक्त सामाग्रीको व्यवस्थापन तथा वितरण एनआरएनए आइसीसीको सचिवालयले गर्ने छ ।

कोरोना महामारीमा सहयोगको निम्ति नेपाल सरकारको अनुरोध अनुसार दूतावासको प्रमुख संरक्षकत्वमा, भवन भट्ट संयोजक, एनआरएनए आइसीसीका कोषाध्यक्ष महेश श्रेष्ठ, एसिया प्यासिफिक उप संयोजक पारसमणि पोटेल, एनआरएनए जापानका अध्यक्ष देविलाल भण्डारी र महासचिव, समितिको सदस्य सचिव साथै समितिको सदस्यामा जापानस्थित अनआरएनए आइसीसीका निवर्तमान तथा पूर्व पदाधिकारी तथा सदस्य, एनसीसी जापानका पूर्व अध्यक्ष, पत्रकार महासंघ, विभिन्न राजनीतिक दलका भातृ संस्था प्रमुख र संघ संस्था प्रमुखहरु सदस्य रहेका थिए ।

समितिले जापानबाट वाई–कनेक्टर, अक्सिमाइजर र अक्सिमिटर भने जापानबाट खरिद गरी पठाएको छ भने अन्य सामाग्रीको लागि भने रकम पठाएको छ ।
अन्त्यमा समितिले उक्त अभियानलाई बन्द गर्दै सहयोग गर्ने सम्पूर्ण महानुभाव, संघ संस्था, दूतावास आदि सम्पूर्णलाई अप्ठ्यारो परिस्थितमा सहयोग गरेकोमा धन्यवाद व्यक्त गरेको छ ।