काठमाडौं ।अछाममा मतदाता नामावली संकलन कार्य सुरु हुने भएको छ । आगामी स्थानीय तह, प्रदेश र संघीय निर्वाचनलाई लक्षित गरेर अछाममा पनि फोटोसहितको मतदाता नामावली संकलन विशेष कार्यक्रम सुरु हुने भएको हो । जिल्लाका सबै स्थानीय तहका केन्द्रमा नामावली संकलन कार्य सञ्चालन गरिन लागिएको हो ।

मंसिर १७ गतेदेखि सुरु हुने नामावली संकलन कार्य दुई चरणमा सञ्चालन हुने निमित्त जिल्ला निर्वाचन अधिकारी गजेन्द्र प्रकाश थारुले जानकारी दिए । दुई चरणमा सञ्चालन हुने नामावली संकलन कार्य प्रत्येक पालिकामा १० दिनसम्म सञ्चालन हुने र बिदाको दिनसमेत जारी रहने बताइएको छ । ६ गाउँपालिका र ४ नगरपालिका सहित १० स्थानीय तह रहेको अछाममा पहिलो चरणमा मंसिर १७ गते देखि मङ्सिर २६ गते सम्म जिल्लाका कमलबजार नगरपालिका, ढकारी गाउँपालिका, चौरपाटी गाउँपालिका, बान्नीगढी जयगढ गाउँपालिका, रामारोशन गाउँपालिकामा सञ्चालन हुनेछ ।

दोस्रो चरणमा मङ्सिर २८ गतेदेखि पुस ८ गतेसम्म साँफेबगर नगरपालिका, मेल्लेख गाउँपालिका, पञ्चदेवल विनायक नगरपालिका, तुर्माखाँद गाउँपालिकामा सञ्चालन हुने निर्वाचन कार्यालयले जनाएको छ । मंगलसेन नगरपालिकाका मतदाता र जिल्ला भित्रका अन्य मतदाताहरूले जिल्ला निर्वाचन कार्यालय अछाम तथा जिल्ला प्रशासन कार्यालय अछाममा रहेको मतदाता नामावली संकलन कक्षबाट सेवा लिन सक्ने कार्यालय प्रमुख थारुले बताए । उनले बाह्य जिल्लाबाट आएका नागरिकका लागी पनि मतदाता नामावली कार्य सञ्चालन हुने जानकारी दिए । नामावली संकलनका लागि दर्ता कर्मचारी, दर्ता स्थल व्यवस्थापक, सहायक दर्ता कर्मचारी र दर्ता स्थल सहयोगी रहने व्यवस्था मिलाइएको जनाइएको छ ।

स्थानीय तहको केन्द्रमा हुने मतदाता नामावली संकलनमा १६ वर्ष उमेर पूरा गरी नागरिकता भएकाहरूले फोटो खिचाउने र नाम दर्ता गराउन सक्नेछन् । फोटोसहितको मतदाता नामावली संकलनको लागि आउँदा अनिवार्य रूपमा नेपाली नागरिकताको सक्कलै प्रमाणपत्र ल्याउनुपर्ने जिल्ला निर्वाचन कार्यालयले जानकारी दिएको छ । अछाममा हालसम्म १ लाख ४८ हजार ४ सय जनाले भन्दा बढीले फोटोसहितको मतदाता नामावलीमा नाम दर्ता गराएका निमित्त जिल्ला निर्वाचन अधिकारी थारुले जानकारी दिए ।