काठमाडौं। जागिर पाउनको लागि सबैभन्दा सीधा तरिका भनेको आफ्नो योग्यतासम्बन्धी विवरण सम्बन्धित रोजगारदातालाई इमेल, कुरियर मार्फत पठाउने वा सम्बन्धित व्यक्तिलाई भेट्ने हो । वा कुनै कम्पनीले जागिरका लागि आवेदन खोलेको भए त्यसमा आवेदन दिने हो । तर, बेलायतका एक व्यक्तिले जागिर पाउनका लागि जे गरे त्यो हाम्रो कल्पनाभन्दा धेरै परको कुरा हो ।

यी व्यक्तिले एक बिल्डिङको पार्किङमा राखिएका हरेक कारमा आफ्नो बायोडाटा टाँस्दै हिँडे । रोच कुरा त के भने यी व्यक्तिले केहीबेरमै मार्केटिङ एग्जिक्युटिभको जागिर पनि पाए । उनको भिडियो सामाजिक संजालमा भाइरल भइरहेको छ । यी व्यक्तिले आफ्नो बायोडाटामा नाम, क्युआर कोड र लिंक्डइन प्रोफइल जस्ता कुरा राखेका थिए । केही घण्टामै उनले जागिर पनि पाए ।

जोनाथन स्विफ्ट नामका यी व्यक्तिले केही पर्चा छपाएका थिए । यी पर्चा पार्किङमा रहेका हरेक गाडीमा टाँसिदिए । उनको यो ट्रिकले काम गर्यो । इन्स्टाप्रिन्ट युकेका मार्केटिङ म्यानेजर क्रेग वासेलले यसको भिडियो शेयर गरेका छन् । क्रेगले नै जोनाथनलाई जागिर दिएका हुन् । क्रेगले पोस्ट गरेको भिडियोमा लेखेका छन् ‘कैयौं पटक धेरै सजिलो तरिका निकै उपयोगी हुन्छन् । सबैभन्दा रोचक कुरा त के भने जोनाथनले टाँसेका पर्चाहरु इन्स्टाप्रिन्ट युकेमै छपाएका थिए ।