काठमाडौं । भारतीय क्रिकेट टिमका पूर्व कप्तान विराट कोहली आजकाल निकै खराब फर्मबाट गुज्रिरहेका छन् । उनले पछिल्लो साढे दुई वर्षमा शतक बनाउन सकेका छैनन् । कोहलीको यो खराब समयले इंग्ल्याण्डमा पनि उनको पीछा छोडिरहेको छैन। यही कारणले अहिले कोहली भगवानको शरणमा पुगेका छन् ।

वास्तवमा विराट कोहली अहिले इंग्ल्याण्डको भ्रमणमा छन् । यहाँ उनको साथमा श्रीमती अनुष्का शर्मा पनि छिन् । दुवै जना लण्डनमा भजन–कीर्तन कार्यक्रममा सहभागी हुन पुगेका थिए । यस कार्यक्रममा पुगेका कोहली र अनुष्काको तस्बिर पनि सार्वजनिक भएको छ ।

भारत र इंग्ल्याण्डबीचको तीन खेलको एकदिवसीय शृंखला हाल १-१ को बराबरीमा छ। सिरिजको अन्तिम अर्थात निर्णायक एकदिवसीय खेल आइतबार (१७ जुलाई) म्यानचेस्टरमा हुनेछ ।

यो भजन-कीर्तन प्रसिद्ध अमेरिकी गायक कृष्ण दासले आयोजना गरेका थिए। उनी भक्ति गीतका लागि परिचित छन् । उनको कीर्तनमा सहभागी हुन कोहली र अनुष्का पनि आएका थिए । कृष्ण दासका एक चेला हनुमान दासले एक तस्विर शेयर गरेका छन्, जसमा उनी कोहली र अनुष्कासँग देखिएका छन् ।

हनुमान दासको यो पोस्टबाट कोहली आफ्नी श्रीमती अनुष्कासँग भजन–कीर्तनको कार्यक्रममा सहभागी भएको खुलासा भएको छ । यो कार्यक्रम लण्डनको युनियन चैपलमा भएको थियो । यो भजन–कीर्तन १४ र १५ जुलाई दुई दिनसम्म चलेको थियो ।