काठमाडौं । बलिउड अभिनेत्री उर्वशी रौतेला यतिबेला आफ्नो क्रिकेट प्रेमका कारण चर्चामा छिन् । उर्वशी एसिया कपमा भारत र पाकिस्तानबीचको खेल हेर्न आएकी थिइन् । क्रिकेटर ऋषभ पन्त र उनको शीतयुद्धका कारण उर्वशी भारतको खेलमा पुगेको सामाजिक सञ्जाल प्रयोगकर्ताको विश्वास छ ।

सेप्टेम्बर ४ मा उर्वशी फेरि भारत–पाकिस्तान म्याच हेर्न आइन् । तर, यसपटक उनको नजर पन्तमा नभई पाकिस्तानी क्रिकेटरमाथि थियो । उर्वशी रौतेला र भारतीय क्रिकेटर ऋषभ पन्त बिचको मतभेद सबैलाई थाहा छ । तर यो झगडाको बीचमा उर्वशीले पाकिस्तानी क्रिकेटर नसीम शाहलाई फलो गरेको देखिन्छ।

त्यसैले खेलपछि उर्वशीले नसीमको भिडियो आफ्नो इन्स्टाग्राम स्टोरीमा सेयर गरिन् । यस भिडियोमा नसीम मैदानमा हाँसेको देखिएका छन् भने उर्वशी उनलाई हेरेर लजाएकी देखिन्छिन् ।

यो भिडियो उर्वशी रौतेलाको फ्यान पेजले बनाएको हो । उर्वशीले आफ्नो इन्स्टाग्राम स्टोरीमा यो कुरा सेयर गरेकी छिन् । भिडियो सार्वजनिक भएसँगै सामाजिक सञ्जालमा मिम्सको बाढी आएको छ । उर्वशीको यो भिडियो देखेर धेरै प्रयोगकर्ताले उनको खिल्ली उडाए भने ऋषभ पन्तका फ्यानहरुको मन दुख्यो ।