काठमाडौं । एक जना एमबीए ग्र्याजुएट युवक आफ्नो बायोडाटा बोकेर बाटोमा उभिए र पाँच दिनमै उनलाई जागिरको प्रस्ताव आयो। यी युवकले यसअघि ९५ पटक कामको लागि अस्वीकारको सामना गर्नुपरेको थियो। यी युवकको कथा सामाजिक सञ्जालमा चर्चामा छ । नोभेम्बरमा यी युवकले आफ्नो नयाँ काम सुरु गर्नेछन् ।

मोहम्मद अरहम शहजाद लन्डनको सडकमा रिजुमे, सुटकेस, लिंक्डइन क्युआर कोड कोड लिएर उभिए। उनी पाकिस्तानका बासिन्दा हुन् । शहजाद एक वर्षदेखि लन्डनमा जागिरको खोजीमा थिए तर सफल भएनन् । बिजनेस म्यानेजमेन्टमा मास्टर्स पढेपछि पनि ९५ कम्पनीमा आवेदन दिए पनि सबै ठाउँबाट रिजेक्ट भयो ।

त्यसपछि उनले आफूलाई कम्फर्ट जोनबाट बाहिर निकालेर विज्ञापन गर्ने सोच बनाए । यसपछि उनी लन्डनको सडकमा आएका थिए । उनी एउटा रिजुमे, सुटकेस र लिंक्डइन क्यूआर कोड बोकेर सडकमा उभिए।

शहजादले बिजनेस इनसाइडरलाई भने, ‘म हरेक दिन अस्वीकारहरूको सामना गर्दा थकित थिएँ। हरेक दिन मेरो लागि तनावपूर्ण बन्यो। त्यसपछि मैले फरक तरिकाले प्रयास गर्ने सोचें।’

शहजाद भन्छन्– ११ जुलाईमा बिहान सबेरै उठेर बोर्ड बनाएर त्यसमा लिंक्डइन क्युआर कोड टाँसें । त्यसपछि उनी आफ्नो सुटकेस र बोर्ड लिएर लन्डनको वित्तीय जिल्ला क्यानरी वार्फ तर्फ प्रस्थान गरे।

शहजादले भने कि उनी त्यहाँ मुस्कुराएको अनुहार लिएर उभिएका थिए, तर आउने-जाने कोहीलाई पनि बाधा पुर्‍याएनन्।

जब शहजाद साँझ त्यहाँबाट निस्किए उनले सम्झे कि २०० जना उनी नजिक आएका थिए । उनले पाएको प्रतिक्रिया निकै अचम्मको थियो । शहजादले भने कि केही मानिसहरू मेरो नजिक आएर रोकिए, लिंक्डइनको क्यूआर कोड स्क्यान गरे, मेरो फोटो क्लिक गरे र अगाडि गए।

यसै क्रममा जेपी मोर्गनका निर्देशक पनि उनीकहाँ आए र आफ्नो बिजनेस कार्ड दिए । शहजादले भने कि यसपछि उनको म्यासेज आयो र उनले शहजादको बायोडाटा आफ्नो कार्यालय वरिपरि सर्कुलेट गरिदिएको बताए ।

जब शहजाद सडकमा उभिरहेका थिए, एकजना व्यक्ति आएर उनी जे गरिरहेछन्, त्यो ठीक नभएको बताए । शहजादका अनुसार उनले सुनेको नकारात्मक कमेन्ट यही थियो ।

सडकमा उभिएर गरेको मिहिनेत अन्ततः पाँच दिनपछि सार्थक भयो, जब डाटा एनालिस्टको काम भेटियो । शहजादले बिजनेस इनसाइडरलाई भने कि यो उनको लागि उत्तम काम हो। शहजादले आउँदो हप्तामा थप तीनवटा अन्तर्वार्ता दिने पनि बताए ।

शहजादलाई भिसाको सबैभन्दा ठूलो समस्या थियो। वास्तवमा, बेलायतमा काम गर्ने विद्यार्थीहरूलाई ‘दक्ष कार्यकर्ता भिसा’ चाहिन्छ। शहजादको विद्यार्थी भिसाको म्याद सकिएको थियो । यस कारणले, उनलाई काम गर्न यो भिसा आवश्यक थियो। यही कारण उनले धेरै कम्पनीमा आवेदन दिन सकेनन् ।

बेलायत सरकारको वेबसाइटमा उपलब्ध जानकारी अनुसार यस भिसाको शुल्क ५७ हजारदेखि १ लाख ३० हजार रुपैयाँसम्म रहेको छ । जुलाईमा, शहजादले बेलायतमा अन्तर्राष्ट्रिय विद्यार्थीहरूले आफ्नो जागिरको क्रममा सामना गर्ने कठिनाइहरूको बारेमा लिङ्कडइन पोस्ट पनि साझा गरे।

तर, अहिले शहजादले डाटा एनालिस्टको काम पाएका छन् । तर यसका लागि उनलाई तीन महिना लाग्यो । किनभने उनको भिसा जारी हुन समय लाग्यो। अब नोभेम्बरबाट नयाँ कम्पनीमा काम सुरु गर्ने शहजाद बताउँछन् ।