काठमाडौं । पाकिस्तान टि-२० विश्वकपको सेमिफाइनलमा पुगेको छ । सुपर १२ चरणको १ खेल बाँकी छँदै सेमिफाइनल पुग्ने ४ टिमको छिनोफानो भएको हो ।

समूह १ बाट पहिले नै न्युजिल्याण्ड र इङ्ल्याण्ड सेमिफाइनल पुगिसकेका छन् । न्युजिल्याण्ड समूहको पहिलो र इङ्ल्याण्ड दोस्रो भएर सेमिफाइनल पुगेका छन् ।

आज बंगलादेशलाई ५ विकेटले पराजित गरेसँगै पाकिस्तान पनि समूह २ बाट सेमिफाइनल पुगेको छ । भारत यसअघि नै सेमिफाइनल पुगिसकेको छ ।

अब समूह २ मा भारत र पाकिस्तानमा को पहिलो र को दोस्रो हुने छिनोफानो हुन बाँकी छ । केहीबेरमा हुने भारत र जिम्बाब्वेको खेलपछि यो समूहको पहिलो र दोस्रो टिम छिनोफानो हुनेछ ।

यो खेल भारतले जितेमा पहिलो हुनेछ र सेमिफाइनलमा इङ्ल्याण्डसँग खेल्नेछ र पाकिस्तानले न्युजिल्याण्ड प्रतिद्वन्द्वी पाउनेछ । यदि यो खेल भारतले हारेमा पाकिस्तान पहिलो हुनेछ र सेमिफाइनलमा इङ्ल्याडसँग खेल्नेछ भने भारतले न्युजिल्याण्डसँग खेल्नुपर्नेछ ।