काठमाडौं । लियोनेल मेस्सीको नेतृत्वमा रहेको अर्जेन्टिनाको टोलीले उत्कृष्ट प्रदर्शन गर्दै फिफा विश्वकप २०२२ को उपाधि जितेको छ । आइतबार लुसेलमा भएको फाइनल खेलमा अर्जेन्टिनाले फ्रान्सलाई पेनाल्टी सुटआउटमा ४–२ ले हराएको हो । यो जितसँगै लियोनेल मेस्सीको विश्वकप जित्ने सपना पूरा भएको छ । अर्जेन्टिनाले तेस्रो पटक विश्वकपको उपाधि जितेको छ । यसअघि उसले सन् १९७८ र १९८६ को विश्वकपमा पनि उपाधि जितेको थियो ।

विश्वकप जितेपछि लियोनेल मेस्सीको सन्यासको पनि अड्कलबाजी भइरहेको छ । यद्यपि मेस्सीले आफुले अर्जेन्टिनाबाट खेल्न जारी राख्ने स्पष्ट पारेका छन् । जे होस्, अर्जेन्टिनाले अबदेखि नै अर्को विश्वकपको लागि टोली तयारीमा ध्यान केन्द्रित गर्नुपर्नेछ किनभने मेस्सी त्यो विश्वकपमा सहभागी नहुन सक्छन्। यदि मेस्सीले अर्को विश्वकप खेले भने पनि उनको उमेर त्यतिबेला ३९ वर्ष हुनेछ । यस्तो अवस्थामा उनको फर्म अहिलेको जस्तो हुने सम्भावना न्युन हुन्छ ।

यो विश्वकप मार्फत अर्जेन्टिनाले दुई जना यस्ता खेलाडी पाएको छ जसले आगामी दिनमा मेस्सीको केही हदसम्म भर्पाइ गर्न सक्नेछन् । यी दुई खेलाडी हुन् जुलियन अल्भारेज र एन्जो फर्नान्डेज। दुवै खेलाडीले फिफा विश्वकपमा उत्कृष्ट खेल प्रदर्शन गर्दै आफ्नो टोलीको जितमा महत्वपूर्ण भूमिका खेलेका थिए । इन्जो फर्नान्डेजले फिफा विश्वकप २०२२ मा उत्कृष्ट युवा खेलाडीको अवार्ड पनि प्राप्त गरेका छन् ।

पहिले २२ वर्षीय फरवार्ड जुलियन अल्भारेजको कुरा गरौं । अल्भारेजले कुल चार गोल गरे र गोल्डेन बुटको दौडमा पनि सामेल भए। सेमिफाइनल खेलमा क्रोएसियाविरुद्ध अल्भारेजले देखाएको खेल फुटबल फ्यानहरूको दिमागमा लामो समयसम्म रहनेछ। उक्त खेलमा दुई गोल गर्नुका साथै अल्भारेजले एक असिस्ट पनि गरेका थिए ।

म्यानचेस्टर सिटीबाट खेल्ने अल्भारेज फ्रान्सका एम्बाप्पेजस्तै उत्कृष्ट गतिमा फुटबल पिचमा दौडिन्छन्, जसले उनलाई निकै विशेष खेलाडी बनाउँछ। जुलियन अल्भारेजले गत वर्ष अर्जेन्टिनाको सिनियर टोलीबाट डेब्यु गरेका थिए र अहिलेसम्म १९ खेलमा सात गोल गरेका छन् ।

अर्कोतर्फ २१ वर्षीय इन्जो फर्नान्डेजले वैकल्पिक खेलाडीका रूपमा विश्वकपको सुरुवात गरेका थिए । तर मेक्सिकोविरुद्ध उत्कृष्ट गोल गरेपछि उनी मिडफिल्डमा टोलीका मुख्य खेलाडी बने । लामो समयदेखि अर्जेन्टिना खेल नियन्त्रण गर्न सक्ने मिडफिल्डरको खोजीमा थियो । यस्तो अवस्थामा टिमसँग एन्जो फर्नान्डेजको रूपमा उत्कृष्ट विकल्प छ । फर्नान्डेजले यसै वर्ष अर्जेन्टिनाका लागि डेब्यु गरेका थिए र उनले अहिलेसम्म १० खेल खेलिसकेका छन् ।