काठमाडौं । नेपाली खेलाडीहरु सन्दीप लामिछाने र अर्जुन साउद बेलायतमा हुने द हन्ड्रेड क्रिकेटको ड्राफ्टमा परेका छन् । इङल्याण्ड एण्ड वेल्स क्रिकेट बोर्डले जारी गरेको खेलाडीहरुको सूचिमा यी दुई नेपाली खेलाडीहरुले स्थान पाएका छन् ।

इंग्ल्याण्ड एण्ड वेल्स क्रिकेट बोर्डको आयोजनामा हुने यो फ्रेन्चाइज क्रिकेट लिग १०० बलको हुन्छ । अहिले यसको तेस्रो संस्करण सुरु हुँदैछ । सन्दीप लामिछाने यसअघि पनि यो फ्रेन्चाइज लिगको टिममा समावेश भए पनि भिसा समस्याका कारण खेल्न पाएका थिएनन् ।

यसपटक भने पूर्वकप्तान सन्दीपसँगै विकेटकिपर ब्याटर अर्जुन साउद पनि ड्राफ्टमा परेका हुन् । प्रतियोगिता खेल्नका लागि ड्राफ्टबाट छनोट हुनुपर्नेछ । ड्राफ्टबाट खेलाडी छनोट २३ मार्चमा हुनेछ र यो स्काइ स्पोर्टसमा प्रत्यक्ष प्रसारण हुनेछ । तेस्रो संस्करणको द हन्ड्रेड क्रिकेट अगस्ट १ बाट सुरु हुँदैछ ।