काठमाडौं । भारतका पूर्व क्रिकेटर सलिम दुर्रानीको ८८ वर्षको उमेरमा निधन भएको छ । समाचार एजेन्सी एएनआईका अनुसार उनी लामो समयदेखि रोगसँग लडिरहेका थिए ।

सलिम दुर्रानीको निधनमा क्रिकेट जगतसँग जोडिएका धेरै चर्चित व्यक्तिहरुले श्रद्धाञ्जली अर्पण गरिरहेका छन् ।आफ्नो समयका भारतका सर्वोत्कृष्ट अलराउन्डर मानिने सलिम दुर्रानीका बारेमा भनिन्छ कि उनले दर्शकको माग भएमा तत्काल छक्का प्रहार गर्ने गरेका थिए ।

भारतीय क्रिकेट टोलीका पूर्व प्रशिक्षक तथा चर्चित खेलाडी रवि शास्त्रीले उनको पुरानो तस्बिर ट्विट गर्दै उनको सम्झना गरेका छन् । क्रिकेटर वीभीएस लक्ष्मणले ट्वीटमा लेखेका छन् कि अर्जुन अवार्ड प्राप्त गर्ने समील दुर्रानी पहिलो भारतीय क्रिकेटर हुन्।

कांग्रेस नेता शशि थरुरले पनि सलीम दुर्रानीलाई श्रद्धाञ्जली दिएका छन्। उनले ट्विट गर्दै भने, “महान क्रिकेटर सलिम दुर्रानीको निधनको खबर सुनेर दुख लाग्यो। काबुलमा जन्मेका सलीम दुर्रानी मानिसहरूलाई खुसी पार्ने गर्थे र जनताको मनपर्ने खेलाडी थिए।”

सलिम दुर्रानीको ८० औँ जन्मदिनमा रेहान फजलले उनीसँग सम्बन्धित धेरै रोचक पक्षका बारेमा बताएका थिए । सलीम दुर्रानीलाई आफ्नो पालामा भारतका उत्कृष्ट अलराउन्डर मानिन्थ्यो। तर दुर्रानी दर्शकको मागमा छक्का हानेका कारण चर्चित थिए ।

सन् १९७३ मा इङ्ल्यान्डको भारत भ्रमणका क्रममा उनी टेस्टमा नखेल्दा सहरभर ‘नो दुर्रानी, ​​नो टेस्ट’ पोस्टर टाँसिएको थियो।

सलिम दुर्रानीको क्रिकेट तथ्याङ्क हेर्दा उनी निकै सामान्य देखिन्छन्… २९ टेस्ट, १२०२ रन, एक शतक, २५.०४ को औसत र ७५ विकेट। तर उनीसँग क्रिकेट खेलेका वा उनलाई खेलेको देख्नेहरूका लागि योभन्दा ठूलो झूट अरू केही हुन सक्दैन।

उनी पक्कै पनि भारतका सबैभन्दा प्रतिभाशाली र स्टाइलिश खेलाडी थिए। अग्लो पातलो शरीर र नीलो आँखा भएका सलीम दुर्रानी जहाँ गए पनि मानिसले घेरिन्थे । उनले दर्शकको आग्रहमा छक्का हान्ने गरेको कुरा निकै चर्चित छ । उनले त्यो छक्का पनि त्यही ठाउँमा हान्थे जहाँ रहेका दर्शकबाट छक्का प्रहार गर्ने माग आएको हुन्थ्यो ।