काठमाडौं। कोशी नदीमा नुहाउने क्रममा बेपत्ता भएका तीन जनामध्ये एकको शव फेला परेको छ।

सुनसरी जिल्लाको बराहक्षेत्र नगरपालिका १ स्थित सप्तकोशी नदीमा नुहाउने क्रममा डुबेर बेपत्ता भएका तीन जना मध्ये एक जनाको शव सशस्त्र प्रहरीले फेला पारी नदीबाट बाहिर निकालेको छ भने अन्य दुई जनाको खोजीकार्य भईरहेको छ।

नुहाउने क्रममा बेपत्ता भएका झापा दमक नगरपालिका ९ बस्ने २० बर्षिया नविन न्यौपानेको शव घटनास्थल नजिक फेला परेको सशस्त्र प्रहरीका सहायक प्रवक्ता डीएसपी शैलेन्द्र थापाले जानकारी दिए।

झापा दमक नगरपालिका ९ बस्ने २२ बर्षिया रुद्र न्यौपाने र उर्लाबारी नगरपालिका ७ बस्ने २० बर्षिया राजन गुरागाई बेपत्ता भएका छन्।

घटनाबारे जानकारी पाएपश्चात नम्बर १ बराह बाहिनी मुख्यालय सुनसरीबाट गोताखोर र सुरक्षा बेश चतराबाट विपद् व्यवस्थापन तालिम प्राप्त टोलीसहित स्थानीयहरूले बेपत्ताहरुको खोजी सुरु गरेका थिए।