काठमाडौं । सर्बियाको राजधानी बेलग्रेडको एक विद्यालयमा गोली चल्दा नौ जनाको मृत्यु भएको छ ।

मृत्यु हुनेमा आठ विद्यार्थी र एक सुरक्षा गार्ड रहेका छन् । आक्रमणकारी एक नाबालिग हुन् र उनले गोली चलाएको त्यही विद्यालयमा पढ्छन् ।

प्रहरीका अनुसार आक्रमणकारीले केही सातादेखि यो आक्रमणको योजना बनाएका थिए र उनीसँग ‘किल लिस्ट’ अर्थात् मारिने व्यक्तिको सूची पनि थियो।

प्रहरीले १३ वर्षीय आक्रमणकारीलाई पक्राउ गरेको छ । यो हमला बेलग्रेडको एक प्राथमिक विद्यालयमा भएको हो ।

आक्रमणमा एक शिक्षक बाहेक ६ विद्यार्थी घाइते भएका छन् । आक्रमणको कारणबारे अनुसन्धान भइरहेको प्रहरीले जनाएको छ ।

आक्रमणकारीले बुबाको लाइसेन्स बन्दुक प्रयोग गरेको बताइएको छ । साथै, यी हत्याहरू अघि, आक्रमणकारी आफ्नो बुबा संग एक भन्दा बढी पटक सुटिङ रेन्ज गएका थिए।

आक्रमणकारीका अभिभावक पनि पक्राउ परेका छन् ।

देशका राष्ट्रपति, एलेक्सान्डर भुकिकले यसलाई आधुनिक इतिहासको सबैभन्दा कठिन दिनको रूपमा वर्णन गरे। आक्रमणपछि देशमा तीन दिने शोकको घोषणा गरिएको छ ।