काठमाडौं । भारतीय प्रधानमन्त्री नरेन्द्र मोदी आइतवार पपुवा न्यू गिनी पुगे थिए जहाँ उनको भव्य स्वागत गरियो। उनलाई स्वागत गर्न विमानस्थल पुगेका पपुवा न्युगिनीका प्रधानमन्त्री जेम्स मारापेले प्रधानमन्त्री मोदीको खुट्टा ढोगेर सम्मान व्यक्त गरेका थिए ।

यहाँ उनले पपुवा न्यू गिनीका प्रधानमन्त्री जेम्स मारापेसँग ‘फोरम फर इन्डिया–प्यासिफिक आइल्याण्ड्स कोअपरेसन’ को तेस्रो शिखर सम्मेलन संयुक्त रूपमा आयोजना गर्नेछन्।

समाचार एजेन्सी पीटीआईको रिपोर्ट अनुसार यो शिखर सम्मेलन २२ मेमा भइरहेको छ । प्रधानमन्त्री मोदी तीन देशको भ्रमणमा छन् र पपुवा न्यू गिनी उनको भ्रमणको दोस्रो बिन्दु हो।

मोदी पपुवा न्यू गिनी भ्रमण गर्ने पहिलो भारतीय प्रधानमन्त्री हुन्। जापानमा भएको समूह ७ देशको शिखर सम्मेलनमा सहभागी भएर उनी यहाँ आइपुगेका हुन् । उनले जापानमा विश्वका धेरै नेताहरुसँग भेट गरे ।

प्रधानमन्त्री नरेन्द्र मोदीले भने – एफआइपीआइसीको यस महत्त्वपूर्ण शिखर सम्मेलनमा सहभागी हुन निमन्त्रणा स्वीकार गरेकोमा सबै १४ प्यासिफिक टापु देशहरूप्रति आभारी छु। एफआइपीआइसी सन् २०१४ मा प्रधानमन्त्री मोदीको फिजी भ्रमणका क्रममा सुरु भएको थियो ।

प्रशान्त टापु देशहरूमा कुक टापुहरू, फिजी, किरिबाटी, गणतन्त्र मार्शल टापुहरू, माइक्रोनेसिया, नाउरु, निउ, पलाउ, पपुवा न्यू गिनी, सामोआ, सोलोमन टापुहरू, टोंगा, टुभालु र भानुअतु समावेश छन्।

पपुवा न्यू गिनीमा, प्रधानमन्त्री मोदीले जेम्स मारापे र गभर्नर जनरल बब डाडेसँग द्विपक्षीय वार्ता गर्नेछन्।